اسلام آباد(مانیٹرنگ ڈیسک) اگلے ہفتے امریکی صدر کے دورہ سعودی عرب سے قبل ایک سعودی عالم دین نے امریکی صدر ٹرمپ کو ’’اللہ کا خادم‘‘ قرار دیدیا۔ تفصیلات کے مطابق سعودی عالم دین نے امریکی ٹرمپ کو اللہ کا خادم قرار دیتے ہوئے کہا ہے کہ وہ مسلمانوں کے مفادات میں بہتر کام کریں گے۔ سعد بن غنیم نے جمعہ کے روز ایک ٹویٹ میں کہا کہ امید ہے اللہ پاک ڈونلڈ ٹرمپ پر اپنے پروں کا سایہ کرتے ہوئے انہیں صحیح سمت میں کام کرنے کی توفیق عطا فرمائے گا۔
سعد بن غنیم نے سماجی رابطے کی ویب سائٹ ٹویٹر پر لکھا کہ ’’ یا اللہ! ٹرمپ تیرے خادموں میں سے ایک خادم ہے، تو اس کی قسمت اور اس کی ذات کا مالک ہے اور اس کی رہنمائی فرماتاکہ وہ مسلمانوں کے بہترین مفادات کیلئے کام کر سکے۔ واضح رہے کہ سعودی عالم دین کے بیان نے سوشل میڈیا پر تہلکہ مچا دیا ہے اور مذکورہ بیان کی شدید مذمت کی جا رہی ہے۔
