ڈھاکہ(این این آئی) بھارت میں جاری انڈین پریمیئر لیگ کے ایک میچ پر لگنے والی شرط کے نتیجے میں ہونے والے تصادم کی وجہ سے ایک بنگلہ دیشی شہری ہلاک ہوگیا۔فرانسیسی خبر رساں ایجنسی اے ایف پی نے بنگلہ دیشی پولیس کے حوالے سے بتایا کہ 33 سالہ سنتوش کمار  ہسپتال میں دم توڑ گیا

وہ شمالی ضلع لال مونیرہٹ کا رہائشی تھا۔مقامی پولیس انسپکٹر مصطفیٰ کمال نے بتایا کہ ‘سنتوش نے 2 مئی کو آئی پی ایل کے ایک کرکٹ میچ پر اپنے دوستوں سے 50 ٹکا کی شرط لگائی تھی، وہ شرط جیت بھی گیا تھا لیکن دوستوں نے اسے شرط کے پیسے دینے سے انکار کیا جس پر جگڑا شروع ہوا-لڑائی کے دوران کسی نے سنتوش کی خصیہ دانی میں لات ماردی جس کے نتیجے میں وہ زمین پر گر گیا جبکہ رنگ پور میڈیکل کالج ہسپتال میں دوران علاج چل بسا۔پولیس سنتوش کی موت کی تحقیقات کررہی ہے تاہم اب تک کوئی گرفتاری عمل میں نہیں آئی ہے۔خیال رہے کہ بنگلہ دیش میں جوا کھیلنا غیر قانونی ہے تاہم دیہی علاقوں میں لوگ جوا اور شرط لگاتے رہتے ہیں خاص طور پر جب ڈومیسٹک کرکٹ لیگ ہو یا کوئی انٹرنیشنل ایونٹ چل رہا ہو۔گزشتہ برس پولیس کی شکایت پر بنگلہ دیشی ٹیلی کام ریگولیٹرز نے 12 بیٹنگ سائٹس کو بلاک کیا تھا۔آئی پی ایل جنوبی ایشیا میں خاصہ مقبول کرکٹ ٹورنامنٹ ہے جس میں بھارت، بنگلہ دیش سری لنکا اور دنیا کی دیگر کرکٹ ٹیموں کے مایہ ناز کھلاڑی شرکت کرتے ہیں اور اس کے میچز براہ راست نشر بھی کیے جاتے ہیں۔اس ایونٹ میں پاکستان کا کوئی کھلاڑی شامل نہیں ہوتا جس کی وجہ پاکستان اور بھارت کے درمیان جاری کشیدگی ہے جس نے کھیل پر بھی منفی اثرات مرتب کیے ہیں۔