نئی دہلی (این این آئی) بھارت کی وزیر خارجہ سشما سوارج نے کہاہے کہ پاکستان میں لا پتہ ہونے والے دو بھارتی شہریوں سے ان کی بات ہوگئی ہے اور وہ پیر تک دہلی واپس آجائیں گے۔
اتوار کی صبح انھوں نے ایک ٹویٹ کر کے بتایا کہ دونوں افراد محفوظ ہیں۔دہلی کی معروف نظام الدین اولیا کی درگاہ کے دو سجادہ نشین سید آصف علی نظامی اور ناظم علی نظامی 6 مارچ کو کراچی گئے تھے اور پھر اچانک 15 مارچ کو لاہور کے ایئر پورٹ سے لا پتہ ہوگئے تھے۔بھارتی وزیر خارجہ سشما سوارج نے ان کی بازیابی کیلئے پاکستانی حکام سے رابطہ کیا تھا۔اتوار کی صبح انھوں نے اپنے ٹوئٹر کے صفحے پر لکھا کہ میں نے کراچی میں ناظم علی نظامی سے ابھی کچھ دیر پہلے بات کی۔ انھوں نے مجھے بتایا ہے کہ وہ محفوظ ہیں اور پیر تک دہلی واپس آجائیں گے۔
