اسلام آباد (آئی این پی) افغان صدر اشرف غنی نے بھارتی دبائو کی بدولت اقتصادی تعاون تنظیم کے 13 ویں سربراہ اجلاس میں شرکت نہیں کی ، خطے کی بدلتی ہوئی صورتحال عالمی سطح پر رونما ہونے والی تبدیلیوں کے تناظر میں ای سی او کے پلیٹ فارم سے ہونے والے اس غیر معمولی اجلاس میں شرکت نہ کرکے ایک بڑا موقع ضائع کر دیا ، ای سی او کے رکن ممالک کے سربراہان سے ملاقات کا موقع بھی کھو دیا۔

ذرائع کے مطابق افغان صدر نے بھارتی دباؤ کے تحت اسلام آباد میں ای سی او کے 13 ویں سربراہ اجلاس میں شرکت نہ کرنے کا فیصلہ کیا۔ واضح رہے کہ بھارت نے اس سے قبل بھی پاکستان میں منعقد ہونے والی سارک کانفرنس کو سبوتاڑ کیا تھا جس کو ملتوی کر دیا گیا تھا۔ بھارت نے ایک بار پھر کوشش کی کہ ای سی او کے 13 ویں اجلاس میں رکن ممالک کی شرکت زیادہ نہ ہو اور افغانستان پر اپنا اثر و رسوخ استعمال کرنے میں کامیاب ہوا ۔