ریاض /واشنگٹن (آئی این پی) امریکا اور سعودی عرب نے ایرانی ایٹمی معاہدے پر سختی سے عمل کرانے پر اتفاق کیا ہے ۔غیر ملکی میڈیاکے مطابق یہ اتفاق رائے امریکی صدر ڈونلڈ ٹرمپ اور سعودی فرماں رواں شاہ سلمان کے درمیان ٹیلی فونک رابطے کے دوران کیا گیا ۔ دونوں رہنماؤ ں کی جانب سے ایرانی ایٹمی معاہدے پر سختی سے عمل کرانے پر اتفاق کیاگیا ۔
وائٹ ہاؤس کے مطابق ڈونلڈ ٹرمپ کا سعودی فرماں رواں شاہ سلمان سے گفتگو کرتے ہوئے کہنا تھا کہ سات مسلم ملکوں پر ویزا پابندی کا مطلب تمام مسلمانوں پر پابندی نہیں، نوے دن میں محفوظ پالیسیاں مرتب کرنے کے بعد تمام ملکوں کو ویزا جاری کریں گے۔ترجمان کے مطابق ڈونلڈ ٹرمپ اور سعودی عرب کے فرماں رواں شاہ سلمان بن عبدالعزیز کے درمیان تقریبا ایک گھنٹے تک ٹیلی فون پر بات چیت ہوئی۔ بات چیت میں دونوں ملکوں کے درمیان فوجی اور معاشی تعاون بڑھانے کے علاوہ انسداد دہشت گردی میں تعاون کو مزید فروغ دینے کے حوالے سے تبادلہ خیال کیا گیا، جبکہ دونوں رہنماؤں نے شام اور یمن میں محفوظ علاقوں کے قیام پر بھی اتفاق کیا۔
