سری نگر/نئی دہلی (آئی این پی)مقبوضہ کشمیر میں برفانی تودہ گرنے سے لاپتہ ہونے والے5بھارتی فوجیوں کو زندہ بچا لیا گیا جبکہ برفانی تودے گرنے سے ہلاکتوں کی تعداد 20سے تجاوز کرگئی ۔ہفتہ کو بھارتی میڈیا کے مطابق ضلع کپواڑہ کے مچل سیکٹر میں لائن آف کنٹرول کے قریب ایک فوجی چوکی پر برفانی تودہ گرا ۔ چیک پوسٹ میں 5 فوجی موجود تھے جو اس برفانی تودے کے گرنے سے لاپتہ ہو گئے ۔

فوج نے اہلکاروں کی تلاش کے لیے فوری طور پر ریسکیو آپریشن شروع کر دیا تھا۔بھارتی فوجی حکام کا کہنا ہے کہ برفانی تودے تلے پھنسے 5فوجیوں کو زندہ نکال کرہسپتال منتقل کردیا گیا ہے ۔دوسری جانب چند روز قبل برفانی تودے تلے دبے مزید فوجیوں کی لاشیں نکال لی گئی ہیں جس کے بعد مرنے والوں کی تعداد 20سے تجاوز کرگئی ہے ۔خیال رہے کہ دو روز قبل بھی کشمیر لائن آف کنٹرول(ایل او سی)کے قریب گوریز کے علاقے میں گاؤں بدوگام میں برفانی تودہ گرنے سے 15 افراد ہلاک ہوئے تھے، جن میں 11 فوجی اہلکار بھی شامل تھے۔ذرائع کا کہنا ہے کہ درجنوں بھارتی فوجی لاپتہ ہوچکے ہیں اور موسم کی سنگین صورتحال کے پیش نظر بھارتی فوج نے علاقے سے فوجیوں کی عارضی طورپر واپسی پر غور شروع کردیا ہے۔ماہرین موسمیات نے آئندہ چند دنوں تک وادی میں مزید برف باری کی پیش گوئی کی ہے جبکہ حکام نے پہلے ہی برفانی تودے گرنے کی وارننگز جاری کر دی تھیں۔لوگوں کو ہدایت کی ہے کہ وہ پہاڑی علاقوں سے دور رہیں اور جو لوگ ایسی علاقوں میں رہتے ہیں وہ باہر نکلنے سے گریز کریں۔خیال رہے کہ کشمیر میں موسم سرما کے دوران اکثر و بیشتر برفباری ہوتی رہتی ہے، جس کی وجہ سے برفانی تودوں کے گرنے کے واقعات بھی پیش آتے رہے ہیں۔