واشنگٹن(مانیٹرنگ ڈیسک) ڈونلڈ ٹرمپ کے امریکہ کا صدر منتخب ہونے کے بعد سے امریکہ میں شور بپا ہے کہ روسی صدر نے ہیکرز کے ذریعے انتخابی نتائج کو ہیک کرکے ڈونلڈ ٹرمپ کو جیت دلوائی۔ امریکی ادارے ایک خفیہ مراسلہ بھی منظرعام پر لا چکے ہیں جس کے مطابق روسی صدر نے انکشاف کیا ہے کہ انہوں نے امریکی انتخابی نتائج پر اثرانداز ہونے کے لیے ایک مہم چلائی تھی۔ اب اوبامہ انتظامیہ نے اس کا بدلہ لینے کے لیے اپنے آخری دنوں میں ایک ایسا کام کر دیا ہے جس سے دنیا پر تیسری عالمی جنگ مسلط ہونے کا خدشہ پیدا ہو گیا ہے۔ برطانوی اخبار ڈیلی سٹار کی رپورٹ کے مطابق اوبامہ انتظامیہ نے اپنے ٹینک ایک ٹرین میں لاد کر روس کی طرف روانہ کر دیئے ہیں اور ماہرین کا کہنا ہے کہ دنیا 13دن کے اندر تیسری عالمی جنگ کے نرغے میں ہو گی۔
رپورٹ کے مطابق یہ ٹینک پولینڈ میں روس کی سرحد کی طرف روانہ کیے گئے ہیں جہاں امریکی اور پولش افواج روس کے دروازے پر مشترکہ جنگی مشقیں کریں گی۔ بات یہی تک رہتی تو بھی ٹھیک تھی لیکن تیسری عالمی جنگ کا خدشہ اس وقت ابھر کر سامنے آیا جب برطانیہ، جرمنی اور کینیڈا نے بھی اپنی کئی بٹالین فوج مشرقی یورپ کی طرف روانہ کر دی۔ اب ان ممالک کی افواج بھی روس کی سرحد کے قریب پہنچ رہی ہے اور امریکی ٹینک بھی۔ رپورٹ کے مطابق اوبامہ انتظامیہ کے پاس ولادی میر پیوٹن کے خلاف کوئی بھی اقدام اٹھانے کے لیے صرف13دن ہیں۔ اس کے بعد تمام اختیارات ڈونلڈ ٹرمپ کے پاس چلے جائیں گے۔ لہٰذا ماہرین کا کہنا ہے کہ ان 13دنوں میں تیسری عالمی جنگ شروع ہونے کا امکان واضح ہو چکا ہے۔

موضوعات:تیسری عالمی جنگ