بیجنگ (آئی این پی) شدید فضائی آلودگی کی وجہ سے جو کئی لوگوں کی سال نو کی تعطیلات کے منصوبوں کو متاثر کرے گی ، مجموعی طورپر 24چینی شہروں میں سرخ الرٹ جاری کیا گیا ہے ، ان شہروں میں شمالی صوبہ ہیبی کے شائی جیا زوانگ ، باؤڈنگ اور لانگ فانگ وسطی چین کے صوبہ ہینان کا شہر جینگ جو اور مشرقی چین کے صوبہ شن ڈونگ کا شہر جینان شامل ہیں۔ چین کے اعلیٰ ماحولیاتی ادارے کے مطابق ان شہروں میں شدید فضائی آلودگی کی وجہ سے سرخ الرٹ کا اجرا گیا گیا ہے ، مزید برآں 21میٹرو پولیٹن اور شہروں جن میں بیجنگ اور تیان جن شامل ہیں نے فضائی آلودگی کی وجہ سے نارنجی الرٹ جاری کئے گئے ہیں جبکہ شمال مغربی صوبہ شان شی کے شیان سمیت 16شہروں میں زرد الرٹ جاری کیا گیا ہے ،توقع ہے کہ فضائی آلودگی کی نئی لہر بیشتر شہروں میں پانچ جنوری تک جاری رہے گی ۔وزارت ماحولیاتی تحفظ کے مطابق اہم صنعتی کمپنیوں کی طرف سے کئے جانیوالے ماحولیاتی اقدامات پر عملدرآمد کی نگرانی کیلئے مختلف صوبائی علاقوں میں وزارت کی طرف سے مجموعی طورپر دس معائنہ ٹیمیں بھیجی گئی ہیں ۔