حلب(آئی این پی )شامی فوج نے مغربی حلب کے اطراف میں حملے کے لیے منصوبہ بندی شروع کردی۔ عرب میڈیا کے مطابق شام کے شہر حلب میں شہریوں کے وحشیانہ قتل عام کے بعد بشارالاسد کی وفادار فوج اور اجرتی قاتل مغربی حلب کے اطراف میں واقع علاقوں میں حملوں کی منصوبہ بندی کر رہے ہیں۔شامی فوج مغربی حلب میں الراشدین اور خان العسل کے مقامات کی طرف پیش قدمی کی تیاری کررہی ہے۔
یہ اطلاعات بھی آئی ہیں کہ شامی فوج نے حلب کے جنوب اور مغرب میں فوجی کمک جمع کرنا شروع کردی ہے تاکہ مغربی حلب میں فوجی کارروائی شروع کی جا سکے۔رپورٹ کے مطابق اسدی فوج مغربی حلب اور اس کے اطراف میں نئی فوجی کارروائی شروع کرنے کے لیے تیار ہے۔ اسدی فوج نے الراشدین میں موجود جنگجوؤں کو چند ایام کے اندر اندر علاقہ خالی کرنے کی مہلت دی ہے، اس ک بعد فوج باقاعدہ آپریشن شروع کرنے کی تیاری کر رہی ہے۔