ایمسٹر ڈیم (آئی این پی)ہالینڈ میں پولیس نے خفیہ ادارے کی اطلاع پرمشتبہ دہشتگرد کو اسلحے سمیت گرفتار کرلیا۔غیر ملکی میڈیا کے مطابق ہالینڈ کی پولیس نے ملکی خفیہ ادارے کی اطلاع پر ایک ایسے 30سالہ مشتبہ دہشت گرد کو گرفتار کیا ہے، جس کے پاس بھری ہوئی خودکار رائفل بھی تھی۔ یہ شخص ہالینڈ کے شہر راٹرڈیم میں جمعہ کی سہ پہر میں گرفتار کیا گیا۔
پولیس کے مطابق اْس کے اپارٹمنٹ کی تلاشی کے دوران طاقتور ممنوعہ بارودی مواد کے چار ڈبے بھی برآمد ہوئے۔ اس شخص کے سامان میں سے کئی قسم کے موبائل فونز اور شام اور عراق میں متحرک دہشت گرد تنظیم ’اسلامک اسٹیٹ‘ کے جھنڈے سے ملتاجلتا خاکہ بھی پولیس نے اپنے قبضے میں لے لیا ہے۔ ڈچ دفتر استغاثہ کے مطابق یہ مشتبہ دہشت گرد دہشت گردی کی واردات کی منصوبہ بندی کر رہا تھا۔
