واشنگٹن(این این آئی)امریکی ریاست کیلیفورنیا کی تین مساجد میں دھمکی آمیز اور نفرت انگیز خطوط بھیجے گئے ہیں جن میں سے ایک خط میں مسلمانوں کو شیطان قرار دیتے ہوئے امریکہ چھوڑنے کا کہا گیا ہے خطوط میں مسلمانوں کیخلاف انتہائی غلیظ زبان استعمال کی گئی ہے ۔تفصیلات کے مطابق امریکہ میں تین مساجد میں دھمکی آمیز اور نفرت انگیزخطوط بھیجے گئے ہیں ۔

ایک خط کیلی فورنیا کے علاقے سان ہوزے میں واقع مسجد کو دھمکی آمیز خط موصول ہوا جس میں کہا گیا کہ مسلمانوں کے ساتھ اب وہی سلوک کیا جائے گا جو ہٹلر نے یہودیوں کیساتھ کیا تھا۔ خط میں کہا گیا کہ مسلمانوں کیلئے عقلمندانہ مشورہ یہی ہے کہ وہ اپنا سامان باندھیں اور یہاں سے نکل جائیں جبکہ خط کے آخر میں صدرڈونلڈ ٹرمپ زندہ باد لکھا گیا ہے۔

دوسری جانب لاس اینجلس میں واقع کونسل فار امریکن اسلامک ریلیشنز ( سی اے آئی آر ) کے ایگزیکٹو ڈائریکٹر حسام الیوش نے دھمکی آمیز خط کی مذمت کرتے ہوئے کہا کہ صدر ٹرمپ کے مسلمانوں کے خلاف نفرت انگیز بیانات نے ایسے واقعات کو جنم دیا اور اب ان کے حامی بھی اسی فکر کے حامل ہیں۔ اگرچہ ٹرمپ اب ان سے لاتعلقی کا اظہار کررہے ہیں جو ایک اچھی بات ہے کہ لیکن ٹرمپ خود کو تمام امریکیوں کا صدرثابت کریں۔سان ہوزے پولیس ڈیپارٹمنٹ کے ترجمان نے کہا کہ پولیس نے واقعے کی تحقیقات شروع کردی ہے جو ایک نفرت پر مبنی سانحہ بھی ہے۔

موضوعات:امریکی انتخابات امریکی مسلمان ٹرمپ کیلیفورنیا گنتی مساجد ہٹلر