اسلام آباد(مانیٹرنگ ڈیسک) ترک صدر طیب اردوان کے صاحبزادے بلال اردوان بھی کرپشن، منی لانڈرنگ اور دیگر سنگین جرائم میں ملوث نکلے۔ تفصیل کے مطابق معروف برطانوی اخبار ’’انڈیپینڈنٹ‘‘ کے مطابق بلال اردوان اٹلی میں کرپشن، منی لانڈرنگ اور دیگر کیسز کے سلسلے میں زیر تفتیش بھی ہیں۔ برطانوی اخبار کے مطابق اٹلی کے قانون نافذ کرنے والے ادارے اگلے مرحلے میں منی لانڈرنگ اور کرپشن کیسز بارے ترک صدر طیب اردوان سے بھی تحقیقات کریں گے۔ برطانوی اخبار کے مطابق ترک صدر کے بیٹے بلال اردوان اربوں روپے کی کرپشن، منی لانڈرنگ میں ملوث ہیں۔
اس سے قبل ’نیو ایسٹرن آؤٹ لک‘ نامی آن لائن جریدے پر بھی مصنف اور تحقیق کار ایف ولیم اینگڈال کا ایک ایسا ہی مضمون شائع ہوا ہے جس میں الزام بازی کرتے ہوئے دعویٰ کردیا گیا ہے کہ ترک صدر کے بیٹے بلال اردوان کا داعش کے ساتھ قریبی گٹھ جوڑ ہے اور وہ داعش کا غیر قانونی تیل سمگل کرنے والے نمایاں ترین کردار ہیں۔مصنف کا کہنا ہے کہ داعش کی آمدنی کا سب سے بڑا ذریعہ اس کے زیر قبضہ علاقے میں تیل کی فروخت ہے، جسے ممکن بنانے کے لئے سب سے اہم کردار رجب طیب اردوان کے صاحبزادے بلال طیب اردوان ادا کرتے ہیں۔ رپورٹ میں الزام لگایا گیا ہے کہ ترک صدر کے صاحبزادے کئی بحری کمپنیوں کے مالک ہیں جنہیں داعش سے خام تیل لے کر یورپی و ایشیائی ملکوں کو بیچنے کے لئے استعمال کیا جارہا ہے، جبکہ ترکی خود بھی داعش سے تیل سمگل کررہا ہے۔

موضوعات:بلال اردوان ترکی طیب اردوان