نئی دہلی(این این آئی) بھارتی وزیراعظم نریندر مودی دورہ امریکہ سے قبل رواں ہفتے افغانستان کا دورہ کریں گے۔ میڈیا رپورٹ کے مطابق نریندر مودی اگلے ماہ 8 جون کو امریکہ میں کانگریس کے مشترکہ اجلاس سے خطاب کرینگے ۔بھارتی چینل این ڈی ٹی وی نے ذرائع کے حوالے سے بتایا کہ وزیراعظم مودی 4 جون کو پہلے افغانستان جائیں گے جہاں وہ ہرات میں سلما ڈیم کا افتتاح کریں گے جس کیلئے فنڈز بھارت نے فراہم کیے ۔این ڈی ٹی وی کے مطابق بعدازاں وزیراعظم مودی 5 جون کو قطر روانہ ہوں گے، جہاں وہ امیر قطر شیخ تمیم بن حماد التھانی سے تجارتی روابط، خصوصاً ہائیڈرو کاربن سیکٹر کے حوالے سے مذاکرات کریں گے۔واشنگٹن میں امریکی صدر براک اوباما سے ملاقات سے قبل نریندر مودی 6 جون کو سوئٹزرلینڈ میں بھی رکیں گے، جہاں وہ سوئس حکام کے ساتھ بلیک منی کا معاملہ اٹھائیں گے۔امریکہ میں نریندر مودی 7 اور 8 جون کو دو طرفہ ملاقاتیں کریں گے ٗ8 جون کو وہ امریکی کانگریس کے ایک مشترکہ اجلاس سے بھی خطاب کریں گے۔رپورٹس کے مطابق 10 جون کو بھارت واپسی سے قبل نریندر مودی میکسیکو کا دورہ بھی کریں گے۔