نیو یارک(این این آئی) امریکی محکمہ خارجہ کے معاون ترجمان مارک ٹونر نے کہا ہے کہ پاکستان اپنی سر زمین پر موجود ہر دہشت گرد گروپ کے خلاف کارروائی کرے۔غیرملکی میڈیا کے مطابق واشنگٹن میں پریس بریفنگ کے دوران امریکی محکمہ خارجہ کے معاون ترجمان نے کہاکہ امریکہ افغانستان میں امن کے قیام کیلئے مصالحتی عمل کی حمایت کرتا ہے ٗملا اختر منصور امریکہ کیلئے واضح طور پر ایک بڑا خطرہ تھے، وہ نا صرف افغانستان میں امریکی اور افغان افواج پر حملے کررہے تھے بلکہ افغان مصالحتی عمل جاری رکھنے میں فعال کردار بھی ادا نہیں کررہے تھے۔ اسی وجہ سے انہیں نشانہ بنایا گیا۔انہوں نے کہا کہ طالبان کی نئی قیادت کے پاس یہ موقع ہے کہ وہ بات چیت دوبارہ سے شروع کر سکتے ہیں ٗاگر ایسا ہوا تو امریکہ طالبان کی نئی قیادت کا خیر مقدم کریگا ٗ مارک ٹونر نے کہا کہ پاکستان اپنی سر زمین پر موجود ہر دہشت گرد گروپ کے خلاف کارروائی کرے ٗ امریکہ نے ماضی میں بھی اْن پرزوردیا ہے اورآئندہ بھی اس پراصرار کرتا رہے گا۔ انہوں نے کہا کہ ممبئی حملے بڑا سانحہ تھا، انصاف چاہتے ہیں ٗامریکہ پاکستانی حکومت پر زور دیتا رہا ہے کہ ممبئی حملوں کی تحقیقات کے لیے بھارتی حکام کے ساتھ تعاون کرے۔امریکی محکمہ خارجہ کے نائب ترجمان مارک ٹونرنے کہا کہ امریکہ کی قومی سلامتی کی خاطر ڈرون حملے جاری رہیں گے اور دہشت گردوں کو نشانہ بناتے رہیں گے ٗامریکی ڈرون حملے میں مارے جانے والے سابق طالبان رہنماملا اختر منصور کے بارے میں ان کا کہنا تھاان کا کردار مثبت نہیں تھا۔ اورملامنصورایساکردارادانہیں کر رہے تھے جوافغانستان کومذاکرات یاامن کی طرف لیجاتا۔