واشنگٹن (این این آئی)امریکہ نے افغان طالبان کے نئے رہنما مولو ی ہیبت اللہ اخونزادہ کو قیام امن کے مذاکرات کی میز پر آنے کی پیشکش کرتے ہوئے کہا کہ وہ مسائل کے حل کیلئے مل کر کام کریں ٗملا ہیبت اللہ اخونزادہ کا نام امریکہ کی دہشتگرد افراد کی فہرست میں شامل نہیں۔امریکی دفترخارجہ میں ہفتہ وار بریفنگ کے دوران ترجمان مارک ٹونر نے کہا کہ طالبان کے نئے رہنما کے پاس مذاکرات کا موقع موجود ہے اور امریکہ کو اْمید ہے کہ وہ اس سے فائدہ اٹھائیں گے۔انھوں نے کہا کہ اْن کے پاس امن کا انتخاب کرنے اور مذاکرات کے ذریعے مسئلے کو حل کرنے کا راستہ موجود ہے ایک سوال کے جواب میں ترجمان مارک ٹونر نے کہا کہ افغان طالبان کے نئے رہنما ملا ہیبت اللہ اخونزادہ کا نام امریکہ کی دہشت گرد افراد کی فہرست میں شامل نہیں ہے۔اگر ملا ہیبت اللہ مذاکرات نہیں کرتے تو کیا وہ امریکہ کا اگلا نشانہ ہوں گے؟ اس سوال کے جواب میں ترجمان نے کہا کہ اس بات کی پیشنگوئی نہیں کی جا سکتی کہ امریکہ اپنی قومی سلامی کے مفاد میں کس کو نشانہ بنائے گا؟یاد رہے کہ چند روز قبل پاکستان کے صوبے بلوچستان میں افغان طالبان کے سابق رہنما ملا اختر منصور امریکی ڈرون حملے میں مارے گئے تھے جس کے بعد افغان طالبان نے مولوی ہیبت اللہ اخونزادہ کو اپنا نیا رہنما منتخب کیا دوسری جانب افغانستان کی حکومت نے افغان طالبان کے نئے رہنما مولوی ہیبت اللہ اخونزادہ سے کہا ہے کہ جنگ ختم کریں یا سنگین نتائج کیلئے تیار ہو جائیں۔