لندن (نیوزڈیسک) برطانوی وزیراعظم ڈیوڈ کیمرون کی بیوی نے نئی گاڑی کی فرمائش کی تو برطانوی وزیراعظم نے وہی کیا جو کروڑوں عام لوگ کرتے ہیں ۔ وہ جمعہ کے دن سیکنڈ ہینڈ گاڑیوں کے ایک ڈیلر کے پاس چلے گئے جب وہ آکسفورڈ شائر ’’ویٹنی سیکنڈ ہینڈ کار سینٹر ‘‘ پر پہنچے تو شوروم کے ملازم انہیں دیکھ کر حیران رہ گئے لیکن سب سے زیادہ حیران شوروم کے مالک لائن ہارث ہوئے ۔ اس موقع پر کوئی مہنگی گاڑی پسند کرنے کی بجائے ڈیوڈ کیمرون نے نیلے رنگ کی ’’2004ماڈل نسان میکرا ‘‘پسند کی جس کی قیمت 15سو پاؤنڈ تھی جو کہ تقریباً 93 ہزار میل چلی ہوئی ہے۔ ہارث نے بتایا کہ جب ٹین ڈاؤننگ سٹریٹ سے اسے کال آئی کہ وزیراعظم ڈیوڈ کیمرون گاڑی دیکھنے اس کے شوروم پر آ رہے ہیں تو میں نے سمجھا کہ میرا کوئی دوست مذاق کر رہا ہے لیکن جب سچ میں وہاں وزیراعظم ڈیوڈ کیمرون آئے تو میں حیران رہ گیا ۔ ڈیوڈ کیمرون تقریباً آدھے گھنٹے تک گاڑیاں دیکھتے رہے۔ وزیراعظم نے کہا کہ مجھے صرف ’’میڈ ان انگلینڈ‘‘گاڑیاں دکھائی جائیں۔ وزیراعظم نے جمعہ والے دن گاڑی پسند کی۔ ہفتے کی صبح دوبارہ شوروم آئے اور یکمشت ادائیگی اپنے کریڈٹ کارڈ سے کر کے گاڑی لے گئے۔ وزیراعظم خود اس گاڑی کو ڈرائیو کر کے ٹین ڈاؤننگ سٹریٹ تک لے کر گئے جبکہ ان کے سکیورٹی سٹاف کی گاڑیاں ہوٹر بجاتی ہوئی ان کے ساتھ جاتی رہیں۔