نیو یارک(این این آئی)پاکستان پیپلز پارٹی کے شریک چیئرمین آصف زرداری نے کہا ہے کہ ایف 16 طیاروں کی فنڈنگ کےلئے پاک امریکہ تنازعہ دونوں ممالک میں دوریوں کا ثبوت ہے۔اپنے ایک بیان میں آصف علی زرداری نے کہا ہے کہ پاکستانی قوم نوجوانوں پر مشتمل ہے  امن اور ترقی کی بدولت پاکستان خطے میں مضبوط جمہوری ملک کے طور پر ابھرا ہے، پاکستان خطے میں مضبوط جمہوری ملک کے طور پر ابھر رہا ہے، پاکستان ترقی کے راستے پر گامزن ہے، ملک میں مشرق سے سرمایہ کاری آ رہی ہے تاہم پاکستانی عوام کو آج بھی دہشت گرد گروپوں سے خطرات کا سامنا ہے۔ افغان جنگ کے 15 سال بعد طالبان پھر مضبوط ہو چکے ہیں۔سابق صدر نے کہا کہ پاک امریکا تعلقات خطے میں روس کی دھمکی کی وجہ سے مضبوط ہوئے تھے تاہم روس اور غیر ریاستی عناصر کے خطرے میں یہ مضبو ط اتحاد کمزور پڑ رہا ہے، پچھلے 15 سال سے دونوں ممالک کے درمیان باہمی تعلقات اتار چڑھاو¿ کا شکار ہیں، ایف سولہ طیاروں کی فنڈنگ کےلئے پاک امریکا تنازعہ دونوں ممالک میں دوریوں کا ثبوت ہے۔پاکستان پیپلزپارٹی کے شریک چیئرمین نے کہا کہ امریکی انتظامیہ پاکستان کی دہشت گردی کے خلاف ضروریات کا اعتراف کرتی ہے،امریکی کانگریس خصوصاً سنیٹر باب کورکر طیاروں کی ڈیل کےخلاف ہیں، امریکی کانگریس کو شبہ ہے تو پاکستان آ کر دیکھ لے کہ ہم دہشت گردوں سے لڑ رہے ہیں۔ امریکا اور پاکستان کے درمیان رواں ہفتے مذاکرات ہوں گے، توقع ہے کہ امریکا دہشت گردی کے خلاف جنگ میں پاکستان کی ضروریات پوری کرے گا۔