ہیکو (آئی این پی) چین کے جنوبی ساحلی صوبے ہونان سے مچھلیاں پکڑنے والی 8000چینی کشتیاں بندر گاہ پر واپس آ گئی ہیں ، اس کی وجہ یہ بتائی گئی ہے کہ جنوبی چینی سمندروں میں مچھلیاں پکڑنے کی پابندی کا سیزن شروع ہو گیا ،ان سمندروں میں 16مئی سے یکم اگست تک مچھلیاں پکڑنے کی اجازت نہیں ہوتی تا ہم جال کے ذریعے یا دیگر منظور شدہ طریقوں سے مچھلیاں پکڑی جا سکتی ہیں ، صوبائی محکمہ فشریز کے مطابق اس پابندی سے 7952کشتیاں متاثر ہوئی ہیں جو صوبے میں موجود کل کشتیوں کا 32فیصد ہیں ،اس صورتحال سے 36000مچھیرے متاثرہوئے ہیں ، اس تعطل کے دوران مچھیروں کو قانون کے بارے میں تربیت دی جاتی ہے ، انہیں نئی ٹیکنالوجی اور سمندر میں حفاظتی اقدامات سے آگاہ کیا جاتا ہے ، جنوبی چینی سمندروں میں اس عرصہ کے دوران مچھلیاں پکڑنے پر پابندی کے سلسلے کا آغاز 1999ء میں کیا گیا تھا، اگرچہ اس سے مچھیروں کی آمدنی میں کمی ہو جاتی ہے تا ہم اس سے مچھلیوں کی حفاظت اور اس سے وابستہ صنعت کے استحکام کیلئے یہ ضروری ہے ، ہر سال یہ پابندی دریائے یانگ ژی اور پویام جھیل میں بھی لگائی جاتی ہے جہاں مارچ میں سب سے زیادہ تازہ پانی دستیاب ہوتا ہے ۔