لندن(این این آئی)لندن کے پہلے مسلما ن اور پاکستانی نژاد میئر صادق خان نے کامیابی کے بعد اپنے پہلے خطاب میں عوام کا شکریہ ادا کرتے ہوئے کہاکہ میں نے کبھی سوچا بھی نہ تھا کہ مجھ جیسا بندہ لندن کا میئر بن جائے گا۔انہوں نے کہا کہ اگرچہ مہم کئی حوالوں سے متنازعہ رہی تاہم مجھے فخر ہے کہ لندن کے لوگوں نے امید کو خوف پر ترجیح دی۔صادق خان نے کہا کہ خوف کی سیاست کی ہمارے شہر میں کوئی جگہ نہیں ہے اسے کبھی ویلکم نہیں کیا جائے گا۔ انہوں نے اپنے وعدوں کو دہراتے ہوئے کہا کہ ہم ٹرانسپورٹ کرایوں میں کمی،سستی ہاؤسنگ سکیمز ،روزگار میں اضافہ اور انٹرپرائززپر سے ٹیکسوں کی کٹوتیوں کے حوالے سے کیئے گئے تمام وعدے پورے کریں گے۔خیال رہے کہ لندن میں مقامی کونسلز اور میئر کے انتخابات میں کامیابی حاصل کرنے کے بعد لیبر پارٹی کے پاکستانی نڑاد صادق خان لندن کے پہلے مسلمان میئر منتخب ہو گئے ہیں۔صادق خان کو 13 لاکھ دس ہزار 143 جبکہ ان کے مخالف ٹوری پارٹی کے زیک گولڈسمتھ کو نو لاکھ 94 ہزار 614 ووٹ ملے۔