نئی دہلی(این این آئی)بھارتی ریاست نئی دہلی کے وزیراعلیٰ اروند کجریوال نے پٹھان کوٹ واقعے پر پاکستانی تحقیقاتی ٹیم کو بھارت آنے کی دعوت دینے پر مودی حکومت کو شدید تنقید کا نشانہ بناتے ہوئے کہاہے کہ پاکستانی تفتیشی ٹیم کو ’مدعو‘ کرنا پٹھان کوٹ حملے میں پاکستانی خفیہ ایجنسی کو’کلین چٹ‘ دینے کے مترادف ہے، گذشتہ عام انتخابات کے دوران وزیر اعظم مودی اس بات کا اعادہ کرتے رہے تھے کہ پاکستان کے خلاف سخت موقف اپنائیں گے لیکن ’ اب کیا ہوگیا ؟ بھارتی ٹی وی کے مطابق ایک بیان میں اروند کجریوال نے کہاکہ بات چیت اوردہشت گردی ایک ساتھ نہیں چل سکتے ۔مودی جی نے پاکستانی جے آئی ٹی کو اس لئے بلایا تھا کہ وہ ہمارے زخموں پر نمک چھڑکیں ،پاکستانی تحقیقاتی ٹیم کودورہ بھارت کی دعوت دیکرمودی نے پوری بھارتی قوم کے سرشرم سے جھکادیئے ہیں، دہلی کے وزیر اعلٰی اروند کیجریوال نے وزیر اعظم کو آڑے ہاتھوں لیتے ہوئے کہا کہ پاکستانی تفتیشی ٹیم کو ’مدعو‘ کرنا پٹھان کوٹ حملے میں پاکستانی خفیہ ایجنسی کو’کلین چٹ‘ دینے کے مترادف ہے۔ کیجریوال نے اسے خارجہ پالیسی کی بھیانک غلطی قرار دیتے ہوئے وزیر اعظم سے بھارت کے عوام سے معافی مانگنے کا مطالبہ کیا ۔ کیجریوال نے مزید کہا کہ گذشتہ عام انتخابات کے دوران وزیر اعظم مودی اس بات کا اعادہ کرتے رہے تھے کہ پاکستان کے خلاف سخت موقف اپنائیں گے لیکن ’ اب کیا ہوگیا ؟ ہمارے وزیر اعظم نے پاکستان کے سامنے گھٹنے کیوں ٹیک دیے؟ انہیں ایسی کون سی مجبوری تھی کہ ملک کو بتائے بغیر ہی وزیر اعظم نواز شریف کو سالگر ہ کی مبارک باد دینے پاکستان جانا پڑ گیا؟۔