نئی دہلی (نیوزڈیسک) بھارتی وزارت داخلہ نے پولیس کو مختلف تعلیمی اداروں خاص طورپرکولکتہ شہر میں زیر تعلیم کشمیریوں کے بارے میں رپورٹ پیش کرنے کی ہدایت کی ہے ۔ کشمیر میڈیا سروس کے مطابق اس اقدام کامقصد کشمیری طلباءپر نظر رکھناہے کہ وہ آئی سی سی ٹی ٹونٹی ورلڈ کپ کے دوران کولکتہ میں کھیلے جانے والے میچوں کے دوران پاکتانی کرکٹ ٹیم کو سپورٹ نہ کرسکیں۔ بھارتی میڈیا کی اطلاعات میں کہاگیا ہے کہ شہر بھر کے کالجوں کو پولیس کے سربراہ کی طرف سے ایک نوٹس جاری کیا گیا ہے جس میں کشمیرسے تعلق رکھنے والے طلباءکے بارے میں معلومات کی فراہمی کیلئے کہاگیا ہے جو وزارت داخلہ کو فراہم کی جائیں گی۔ یاد رہے کہ نئی دلی کی جواہر لال نہرو یونیورسٹی سٹوڈنٹس یونین کے صدر کنہیا کمار کی گرفتاری کے خلاف بھارت بھر میں نریندر مودی کی حکومت کے خلاف زبردست مظاہرے کئے گئے تھے ۔ کنہیا کمار کو رواں سال نو فروری کو یونیورسٹی میں محمد افضل گورو کی شہادت کی برسی کے موقع پر تقریب منعقد کرنے پربغاوت کے الزام میں گرفتار کیاگیا تھا ۔