بغداد(نیوز ڈیسک)عراق کے تاریخی وسطی صوبے بابل کے گورنر پر تنقید کی پاداش میں ایک تیرہ سالہ بچی کا گھر نذر آتش کردیا گیا ہے۔میڈیار پورٹس کے مطابق اس جرآت مند بچی روان سالم حسین نے گورنر صادق مدلول السلطانی کو ٹیلی ویڑن پر ”بابل میں ثقافتی صورت حال” کے موضوع پر ایک براہ راست مباحثے کے دوران چیلنج کیا تھا اور کہا تھا کہ وہ یہ بات ثابت کریں گی کہ گورنر صاحب نے صوبہ بابل کو پچاس سال پیچھے دھکیل دیا ہے۔روان حسین کے والد سالم نے بتایا کہ صوبائی دارالحکومت الحلّہ میں واقع ان کے مکان کو البغدادیہ ٹی وی پر تنقید کا یہ کلپ نشر ہونے کے چند گھنٹے بعد آگ لگا دی گئی تھی۔پولیس کے ایک کپتان کا کہنا ہے کہ ایک خراب ہیٹر کی وجہ سے یہ آگ لگی تھی لیکن سالم کا کہنا ہے کہ ہیٹر تو بند تھا اور آتش گیر مواد سے آگ لگی تھی۔انھوں نے کہا کہ اس واقعے سے متعدد سوالات پیدا ہوگئے ہیں۔خاص طور پر اس کے وقت کے حوالے سے سوال پیدا ہوئے ہیں کہ راون کا ویڈیو کلپ نشر ہونے کے چھے گھنٹے کے بعد ہی یہ آگ لگنا تھی۔سالم کا کہنا تھا کہ جب آتش زدگی کا واقعہ پیش آیا تو اس وقت وہ اور ان کی بیٹی دارالحکومت بغداد میں ایک احتجاج میں شریک تھے۔واضح رہے کہ کم سن راون فرانس میں منعقدہ بین الاقوامی ثقافتی میلے میں شرکت کرنے والے عراقی وفد میں شامل تھیں۔وہ بچوں اور یتیموں کے حقوق کے لیے سرگرم ہیں۔