پیانگ یانگ (نیو ز ڈیسک) شمالی کوریا میں حکمراں جماعت ورکرز پارٹی کی 70 ویں سالگرہ کے موقع پر تاریخ کا سب سے بڑا جشن منا رہا ہے۔ اطلاعات کے مطابق اس موقع پر بکتر بند گاڑیوں اور بیلسٹک میزائلوں کے کارواں کے علاوہ دارالحکومت پیانگ یانگ میں فوجیوں کی پریڈ بھی ہو گی۔ شمالی کوریا کے سپریم لیڈر کم جونگ ان اس جشن کی صدارت کریں گے تاہم کوئی بھی معروف عالمی رہنما اس تقریب میں شرکت نہیں کر رہا ہے۔ تجزیہ نگاروں کا کہنا ہے اس کے باوجود اس تقریب پر دنیا کی نگاہیں ہوں گی کہ شمالی کوریا اس موقع پر کسی نئے فوجی سازو سامان کی نمائش تو نہیں کرتا ہے۔ ابھی یہ واضح نہیں ہے کہ شمالی کوریا کے پہلے رہنما کم ال سونگ کے پوتے کم جونگ ان دن بھر جاری رہنے والی اس تقریب میں کسی مرحلے پر خطاب بھی کریں گے۔ حکام نے تقریبات کی تفصیلات جاری نہیں کی ہیں تاہم ہزاروں شہری مختلف چوراہوں پر ٹارچ لائٹ پریڈ کی مشق کرتے ہوئے دیکھے گئے ہیں۔ امید کہ یہ پریڈ شام کو ہوگی۔ دریا کے کنارے ایک بڑا سٹیج بھی لگایا گیا ہے جہاں خواتین پر مشتمل شمالی کوریا کا معروف ترین میوزیکل بینڈ ’موران بونگ‘ اپنا پروگرام پیش کرے گا۔ شمالی کوریا کے سب سے قریبی دوست چین نے اس موقعے پر اپنی کمیونسٹ پارٹی کے ایک سینیئر رہنما کواس تقریب میں شرکت کے لیے روانہ کیا ہے۔