میانمار(نیوزڈیسک)میانمار کی بحریہ نے سمندر میں پھنسے مہاجرین کی کشتیوں کو بچانے کے کام کا آغاز کر دیا ہے۔ حکام کے مطابق ملکی بحریہ اب تک 208 افراد کو ساحل تک لے آئی ہے۔ میانمار کے صوبہ راکھین کے ایک سینیئر اہلکار ٹِن ماونگ سوے Tin Maung Swe نے میڈیاکو بتایا کہ گزشتہ روز نیوی کے ایک جہاز نے دو کشتیوں کے مسافروں کو بچایا۔ ان کا کہنا تھا کہ ان میں سے ایک کشتی پر قریب 200 بنگالی سوار تھے۔ واضح رہے کہ میانمار میں روہنگیا نسل کے شہریوں کے لیے عام طور پر بنگالی کا لفظ استعمال کیا جاتا ہے۔ عالمی اداروں کا اندازہ ہے کہ آج کل کشتیوں پر سوار قریب سات ہزار غیر قانونی تارکین وطن خلیج بنگال میں بھٹک رہے ہیں۔