لاہور( این این آئی) پاکستان تحریک انصاف کے ٹکٹ ہولڈر عبداللہ طاہر کے قتل میں اہم اور بڑی پیشرفت سامنے آ گئی،
پی ٹی آئی رہنما کو قتل کروانے والے شخص کا نام سامنے آ گیا۔ پولیس ذرائع کے مطابق پی ٹی آئی رہنما عبداللہ طاہر کو نارووال کے رہائشی زمان کوگی بٹ نے شوٹر ز کے ذریعے قتل کروایا۔بتایاگیا ہے کہ ریت کے ٹھیکے پر کوگی بٹ کا عبداللہ طاہر کے ساتھ جھگڑا ہوا تھا،کوگی بٹ نے عبداللہ طاہر کو نارووال میں ریت کا ٹھیکہ لینے سے منع کیا،عبداللہ طاہر نے اس کے باوجود نارووال میں ریت کا ٹھیکہ لیا،کوگی بٹ نے عبداللہ طاہر کو اسی رنجش میں شوٹرز سے قتل کروا دیا۔ پولیس کے مطابق کوگی بٹ اس وقت امریکہ میں مقیم ہے،کوگی بٹ کی گرفتاری کے لیے ریڈ وارنٹ جاری کروایا جا رہے ہیں۔جیسے ہی ریڈ وارنٹ ملیں گے کوگی بٹ کو بیرون ملک سے گرفتار کر لیا جائے گا۔ یہ بھی انکشاف ہوا ہے کہ کوگی بٹ 20 کے قریب افراد کو قتل کر چکا ہے اور قتل ہونے والوںمیں اس کا بھائی بھی شامل ہے ۔پولیس حکام کے مطابق عبداللہ طاہر کو قتل کرنے والے شوٹرز کے بہت قریب پہنچ گئے ہیں اور انہیں جلد گرفتار کر لیا جائے گا۔
علاوہ ازیں صوبائی وزیر قانون رانا محمد اقبال نے مقتول کی صاحبزادی کے ویڈیو بیان پر ردِعمل میں کہا ہے کہ عبداللہ طاہر کے اہل خانہ کے دکھ میں برابر کے شریک ہیں،مقتول کے اہل خانہ کو مکمل انصاف فراہم کرنا حکومت کی ذمہ داری ہے،مجرموں کو قانون کے مطابق قرار واقعی سزا دلوائی جائے گی،واقعہ کی ہر پہلو سے تحقیقات جاری ہیں،شواہد کی بنیاد پر تحقیقات آگے بڑھ رہی ہیں،قاتلوں اور ان کے سہولت کاروں کو بہت جلد قانون کی گرفت میں لایا جائے گا۔
