نئی دہلی (نیوزڈیسک)بھارتی وزارت داخلہ نے پارلیمان کو بتایا ہے کہ ان کے پاس ممبئی میں جرائم کی دنیا کے سابق سرغنہ داو د ابراہیم کے ٹھکانے کے بارے میں معلومات نہیں ۔ جب تک اس بارے میں پتہ نہیں چلتا انھیں واپس لانے کی کارروائی شروع نہیں کی جا سکتی۔میڈیا رپورٹ کے مطابق بھارتی پولیس ایک طویل عرصے سے داو د ابراہیم کو تلاش کر رہی ہے۔وہ 1993 میں ممبئی میں ہونے والے سلسلہ وار بم دھماکوں کے معاملے میں پولیس کو مطلوب ہیں اور ان کے خلاف ریڈ کارنر نوٹس بھی جاری کیا جا چکا ہے۔داو د ابراہیم کی حوالگی کے معاملے پر وزیر مملکت برائے امور داخلہ ہری بھائی چوہدری نے منگل کو لوک سبھا میں اپنے بیان میں کہا کہ داو د کے بارے میں حکومت کے پاس معلومات نہیں اور ان کا پتہ چلتے ہی حوالگی کا عمل شروع کیا جائے گا۔لوک سبھا میں ایک تحریری سوال کے جواب میں انہوںنے کہاکہ اقوام متحدہ کی سلامتی کونسل نے بھی ان کے خلاف ایک خصوصی نوٹس جاری کیا ہے اس شخص کے ٹھکانے کے بارے میں ابھی تک پتہ نہیں چل پایا ہے، جیسے ہی پتہ چلے گا، اسے بھارت لانے کی کارروائی شروع کی جائےگی۔