اسلام آباد (نیوزڈیسک) یمن سے بھارتی شہریوں بحفاظت نکالنے پر بھارتی وزیراعظم نریندر مودی نے وزیراعظم نواز کے جذبہ خیرسگالی پر تشکر کا اظہار کیا ہے۔ تفصیلات کے مطابق بھارتی وزیراعظم نریندر مودی نے مائیکرو بلاگنگ ویب سائٹ ”ٹوئٹر“ پر جاری ایک پیغام میں کہا ہے کہ وہ 11 بھارتی شہریوں کو نئی دلی پہنچنے پر خوش آمدید کہتے ہیں اور وزیراعظم نواز شریف کا شکریہ ادا کرتے ہیں کہ انہوں نے اپنے شہریوں کے ساتھ بھارتی شہریوں کو بھی یمن سے بحفاظت نکال لیا۔ ان کا کہنا تھا کہ انسانیت کی خدمت کیلئے کوئی سرحد نہیں ہوتی۔ واضح رہے کہ یمن میں محصور پاکستانیوں سمیت چین اور بھارت کے شہریوں کو بھی پاکستانی بحری جہاز کے ذریعے پاکستان لایا گیا جس کے بعد آج انہیں پاک فضائیہ کے خصوصی طیارے کے ذریعے نئی دلی بھیجا گیا ہے۔