اسلام آباد (نیوز ڈیسک)بھارتی فلمی دنیا کے معروف اداکار اوم پوری کے انتقال کے برسوں بعد ان کی پہلی اہلیہ سیما کپور نے اپنی ازدواجی زندگی سے متعلق ایسے دعوے کیے ہیں جنہوں نے ایک مرتبہ پھر مرحوم اداکار کی نجی زندگی کو موضوعِ بحث بنا دیا ہے۔

ایک حالیہ انٹرویو میں سیما کپور نے کہا کہ شادی سے ایک روز قبل اوم پوری نے انہیں الگ لے جا کر بتایا تھا کہ ماضی میں ان کے گھر میں کام کرنے والی ایک خاتون کے ساتھ ان کے ذاتی تعلقات رہے تھے۔ سیما کے مطابق یہ بات سن کر وہ شدید ذہنی صدمے سے دوچار ہوئیں، لیکن چونکہ شادی کی تمام تیاریاں مکمل ہو چکی تھیں، اس لیے انہوں نے آخری وقت پر رشتہ ختم کرنے کے بجائے شادی کرنے کا فیصلہ کیا۔

انہوں نے مزید دعویٰ کیا کہ شادی کے بعد دونوں کے تعلقات بتدریج خراب ہوتے گئے۔ ان کے بقول بعد میں اوم پوری کی قربت نندیتا پوری سے بڑھنے لگی، جس کے باعث ان کی ازدواجی زندگی مزید مشکلات کا شکار ہو گئی اور بالآخر دونوں کی علیحدگی ہو گئی۔

سیما کپور کا کہنا تھا کہ اس دوران وہ حاملہ بھی تھیں، تاہم علیحدگی، ذہنی دباؤ اور جذباتی پریشانی کے باعث وہ اپنے ہونے والے بچے سے محروم ہو گئیں۔ انہوں نے یہ بھی الزام عائد کیا کہ اس مشکل وقت میں اوم پوری نے انہیں وہ جذباتی تعاون فراہم نہیں کیا جس کی انہیں ضرورت تھی، اور یہی بات آج بھی انہیں دکھ پہنچاتی ہے۔

واضح رہے کہ اوم پوری اور سیما کپور نے 1990 میں شادی کی تھی، لیکن چند سال بعد ان کی راہیں جدا ہو گئیں۔ بعد ازاں اوم پوری نے 1993 میں نندیتا پوری سے دوسری شادی کی، جن سے ان کا ایک بیٹا ایشان پوری ہے۔ تاہم بعد کے برسوں میں اوم پوری اور نندیتا کے تعلقات بھی مختلف مواقع پر تنازعات کا شکار رہے۔