بغداد (نیوز ڈیسک) عراقی افواج اور کرد ملیشیا نے تکریت شہر میں داعش کے خلاف نمایاں کامیابیاں حاصل کرلی ہیں لیکن شہریوں پر پہلے سے بھی بڑی قیامت ٹوٹ پڑی ہے۔
صلاح الدین صوبائی کاﺅنسل کے سربراہ احمد کریم کا کہنا ہے کہ شہر میں گھروں اور دکانوں کو جلایا جارہا ہے اور جنگجو ہرجگہ کو لوٹ رہے ہیں۔ شہر میں برپا ہونے والے غدر کی وجہ سے بغداد کو روانہ ہونے والے احمد کریم کا کہنا ہے کہ ان کے شہر کو ان کی آنکھوں کے سامنے جلادیا گیا اور جو ہورہا تھا وہ اسے کنٹرول نہیں کرسکتے تھے۔ عراقی وزیراعظم حیدر العبادی کے دفتر سے جاری کئے گئے بیان میں کہا گیا ہے کہ مجرموں کے گینگ تکریت شہر میں عراقی فورسز اور اتحادی پیراملٹری فورسز کو ملنے والی کامیابیوں کا تاثر خراب کرنے کے لئے کوششیں کررہے ہیں۔
عراقی وزیراعظم کی طرف سے فورسز کو حکم دیا گیا ہے کہ داعش سے واپس لئے گئے تکریت شہر میں لوٹ مار کی مخالفت کی جائے اور ذمہ داران کو گرفتار کیا جائے۔ مقامی میڈیا کا کہنا ہے کہ تاحال اس حکم کے اثرات نظر نہیں آتے اور شہر میں ہر طرف آگ اور لوٹ مار نظر آتی ہے۔
