نئی دلی (نیوز ڈیسک) بچوں کے کھلونا جہاز گُم جانا تو معمول کی بات ہے لیکن آپ نے کبھی یہ نہیں سنا ہو گا کہ کسی ملک کی ایئرفورس اپنے اصلی جہاز گُما بیٹھی۔ یہ مضحکہ خیز حادثہ بھارتی ایئرفورس کے ساتھ پیش آچکا ہے جو اپنے طیارے بیرون ملک اپ گریڈ کروانے کی کوشش میں ان میں سے کم از کم 5 طیارے گنوا بیٹھی ہے اور اب ان کا کوئی سراغ نہیں مل رہا۔
بھارتی ایئرفورس نے اپنے 40 عدد An-32 ٹرانسپورٹ طیارے یوکرین کے اینٹونوو پلانٹ سے اپ گریڈ کروانے کا معاہدہ کیا تھا۔ جریدے ”ڈیفنس نیوز“ کا کہنا ہے کہ بھارتی ایئرفورس کے ایک سینئر افسر نے نام خفیہ رکھنے کی شرط پر بتایا ہے کہ اپ گریڈیشن کے لئے بھیجے گئے طیاروں میں سے 5 لاپتہ ہوگئے ہیں اور یوکرینی حکومت کے ساتھ معاملہ اٹھانے اور تلاش کی بھرپور کوشش کے باوجود ان طیاروں کے بارے میں کچھ پتہ نہیں چل رہا کہ انہیں کون لے گیا۔
بھارت اپنے طیاروں کی اپ گریڈیشن کے ذریعے ان کی عمر 25سے 40 سال کروانا چاہ رہا تھا جبکہ ان میں نئے کاک پٹ اور ایوی اونکس سسٹم بھی لگوانا چاہ رہا تھا۔ جریدے کا کہنا ہے کہ جب اس عجیب و غریب واقعے کے متعلق معلومات لینے کے لئے یوکرینی سفارتخانے سے رابطہ کیا گیا تو ان کا کہنا تھا کہ یہ اینٹونوو کمپنی اور بھارتی ایئرفورس کا آپس کا معاملہ ہے وہ خود ہی اسے حل کریں گے۔ یہ بھی معلوم ہوا ہے کہ بھارتی ایئرفورس طیاروں کی گمشدگی پر شدید پریشان ہے اور اسے سمجھ نہیں آرہی کہ انہیں کہاں تلاش کرے اور دنیا کو اس کے متعلق کیا بتائے۔
