بغداد / لندن: عراق کے صوبے انبار میں داعش جنگجوؤں نے 43 افرادکوزندہ جلادیا۔

حکام نے بتایا کہ باغیوں نے ان افراد کو دارالحکومت بغداد سے چند روز قبل یرغمال بنایا تھا۔ دریں اثنا شمالی عراق میں کرد ملیشیا نے داعش کے ایک حملے کو پسپا کردیا، جھڑپ میں 35 جنگجو ہلاک ہوئے۔

ادھر اقوام متحدہ کے تفتیش کار اندازاً 200 ایسے افراد کے نام ظاہر کرنے پرغورکر رہے ہیں جن پرشام میں جنگی جرائم میں ملوث ہونے کا شبہ ہے۔ تفتیش کاروں نے کہا ہے کہ شام میں جنگی جرائم میں ’بہت زیادہ اضافہ‘ ہوا ہے۔

برطانوی پولیس نے مشرقی لندن سے تعلق رکھنے والی ان 3 لڑکیوں کی سلامتی کے بارے میں شدید خدشات ظاہر کیے ہیں جو پولیس کے خیال میں شام میں دولت اسلامیہ کا حصہ بننے کیلیے ترکی کے راستے وہاں پہنچی ہیں۔ 15 سالہ شمیمہ بیگم، 16 سالہ قدیضہ سلطانہ اور ان کی 15 سالہ ساتھی منگل کو لندن سے ترکی روانہ ہوئی تھیں۔