اسلام آباد (این این آئی)گوجرانوالہ میں ڈی ایچ کیو ہسپتال میں 100فیصد وینٹی لیٹرز کورونا مریضوں سے بھرنے کے باوجود اضافی وینٹی لیٹر مہیا نہ کئے جاسکے۔تفصیلات کے مطابق ڈی ایچ کیو ہسپتال میں وینٹی لیٹرز 100 فیصد مریضوں سے بھرنے کے معاملے پر ہسپتال میں وینٹی لیٹرز کی تعداد بڑھانے کے دعوے بس دعوے ہی رہ گئے ۔ہسپتال انتظامیہ کے مطابق اب تک ایک بھی اضافی وینٹی لیٹر نہیں مل سکا، لاہور سے بھجوائے گئے وینٹی لیٹر یا ایمبولینس ہسپتال نہیں پہنچیں، ریسکیو 1122 سے پانچ موبائل وینٹی لیٹر

مانگے تھے۔ ہسپتال انتظامیہ کا کہنا ہے کہ پرائیویٹ ہسپتال ایسوسی ایشن سے10 وینٹی لیٹر مانگے گئے تھے، ریسکیو اور پرائیویٹ ہسپتالوں کے وینٹی لیٹرز ابھی تک نہیں پہنچے۔انتظامیہ کا کہنا ہے کہ این ڈی ایم اے کے بھجوائے گئے 10 خراب وینٹی لیٹرز بھی ٹھیک نہیں کروائے گئے، ڈی ایچ کیو ہسپتال میں 105 مریض زیر علاج ہیں، وینٹی لیٹرز کی عدم دستیابی سے مریضوں کی جانوں کو خطرات لاحق ہیں۔واضح رہے کہ ایک روز قبل وزیر صحت یاسمین راشد نے وینٹی لیٹرز والی ایمبولینسز بھیجنے کی خبر دی تھی۔