پشاور(این این آئی)خیبرپختونخوا کے وزیر صحت تیمور سیلم خان جھگڑا نے اس امر کا اعلان کیا ہے کہ صوبے میں روزانہ کی بنیاد پر 3 ہزار سے زائد کورونا تشخیصی ٹیسٹ کرنے کی صلاحیت حاصل کر لی ہے۔ لوگ مفت کورونا ٹیسٹ کے لیے 1700 پر کال کریں محکمہ صحت کی ریپڈ رسپانس ٹیم آپ کے گھر پر آ کر نمونے حاصل کرے گی۔

وزیر صحت کا اپنے ٹوئٹر پیغام میں خیبرپختونخوا کی لیبارٹریوں کی محنت کو قابل ستائش قرار دیتے ہوئے کہا کہ انہوں سرعت کے ساتھ بتدریج اپنی استعداد میں اضافہ کیا اور آج صوبے میں روزانہ کی بنیاد پر 3 ہزار ٹیسٹوں کا سنگ میل عبور کر لیا۔ خیبرپختونخوا کو اس وقت کورونا ٹیسٹنگ کے لیے 15 لیبارٹریوں کی معاونت حاصل ہے جس میں سرِ فہرست پبلک ہیلتھ ریفرنس لیبارٹری خیبر میڈیکل یونیورسٹی ہے جہاں 1500 سو سے زائد ٹیسٹ روزانہ ہو رہے ہیں۔ ان لیبارٹریوں میں این آئی ایچ اسلام آباد کے علاوہ نجی شعبوں کی لیبارٹریاں بھی شامل ہیں۔ کے ایم یو پبلک ہیلتھ لیبارٹری نے گزشتہ 6 دنوں میں 8 ہزار سے زائد ٹیسٹ کیے ہیں۔ کے ایم یو لیب کی ساری ٹیم کی کارکردگی قابل ستائش ہے۔ انہوں نے کہا کہ روزانہ کی بنیاد پر 1500 سے زائد ٹیسٹ کرنے کی صلاحیت کی بنا پر کے ایم یو پبلک ہیلتھ لیبارٹری کا شمار ملک کی بڑی لیبارٹریوں میں کیا جا سکتا ہے۔ تیمور جھگڑا نے کہا کہ صوبے میں اب تک 87528 کورونا ٹیسٹ کیے جا چکے ہیں۔ ان ٹیسٹس میں سے 16.5 فیصد مثبت آئے۔ گزشتہ 5 دنوں میں اوسطاً 2843 ٹیسٹ ہوئے ہیں جبکہ گزشتہ روز صوبے میں 3121 کورونا ٹیسٹ ہوئے ہیں۔ تیمور جھگڑا نے کہا کہ صوبے میں کورونا ٹیسٹنگ کی استعداد میں مزید اضافہ کریں گے۔ مزید لیبارٹریوں کے قیام کے لیے اقدامات اٹھائے جا رہے ہیں اور کئی ایک پر کام مکمل بھی ہو چکا ہے۔ انہوں نے عوام سے اپیل کی کہ وہ حفاظتی تدابیر اختیار کرتے ہوئے ماسک کا استعمال لازمی کریں اور علامات ظاہر ہونے کی صورت میں 1700 پر کال کریں۔ محکمہ صحت کی ریپڈ رسپانس ٹیم آپ کے گھر آ کر نمونے حاصل کرے گی۔

موضوعات:شہریوں کو مفت ٹیسٹ کرانے کی سہولت کا اعلان