اسلام آباد(آن لائن) کورونا وائرس کے بعد شہر اقتدار میں پولن الرجی نے بھی سر اٹھانا شروع کردیا ہے،منگل کو اسلام آباد کے سیکٹر ایچ ایٹ میں پولن کی شرح سب سے زیادہ 17ہزار254 فی کیوبک میٹر ریکارڈ کی گئی،پولن سے دمہ، شوگر، بلڈ پریشر کے مریضوں کے مشکلات میں اضافہ ہوسکتا ہے۔
وفاقی دارلحکومت میں کرونا وائرس کے ساتھ ساتھ پولن الرجی کا خطرہ بھی بڑھنے لگا ہے جس کی بنیاد پر محکمہ موسمیات کے حکام نے شہریوں کو احتیاطی تدابیر اختیار کرنے کا مشورہ دیا ہے محکمہ موسمیات کے مطابق شہتوت سمیت آٹھ پودے پولن کے پھیلاؤ کا سبب بنتے ہیں اور پولن کی مقدار کاونٹ کرنے کیلئے اسلام آباد میں مانیٹرنگ ڈیوائس نصب ہیں اور منگل کے روز اسلام آباد کے سیکٹر ایچ ایٹ میں پولن کی شرح سب سے زیادہ 17ہزار254 فی کیوبک میٹر ریکارڈ کی گئی ہے جو کہ بہت زیادہ مقدار ہے محکمہ موسمیات کے مطابق اگر پولن کی مقدار فی کیوبک میٹر1500 سے تجاوز کر جائے تو اسے بلند ترین سطح سمجھا جاتا ہے ماہرین صحت کے مطابق پولن سے دمہ، شوگر، اوربلڈ پریشر کے مریضوں کے مشکلات میں اضافہ ہوسکتا ہے پولن سے متاثرہ افراد کو سانس لینے، چلنے پھرنے، دل کی دھڑکنیں تیز ہونے کی شکایت ہوتی ہے اسی طرح پولن کے متاثرین کو بے چینی اور زیادہ پسینہ آنے کی شکایت ہوتی ہے ماہرین صحت کے مطابق پولن الرجی سے بچاو کیلئے ضروری ہے صبح کے وقت گھر سے نکلتے وقت ماسک کا استعمال کریں جبکہ پولن سے بچاو کیلئے باربار ہاتھ منہ دھوئیں اور شام کے وقت گھروں کے دروازوں اور کھڑکیوں کو بند رکھیں۔
