اسلام آباد(این این آئی) کورونا وائرس کے 250 سے زائد مشتبہ مریض معائنے کیلئے اسلام آباد میں پمز اسپتال پہنچ گئے۔تفصیلات کے مطابق شہری نزلہ زکام اور بخار لگتے ہی کرونا وائرس کے شبے میں ہسپتالوں کا رخ کرنے لگے ہیں، پمز اسپتال میں اب تک 250 سے زائد مشتبہ مریضوں کو معائنہ کے لیے لایا گیاہے ان میں سے 40 کے قریب افراد کے خون کے نمونے ٹیسٹ کیلئے این آئی ایچ کو بھجوادیے گئے تھے۔ہسپتال ذرائع کے مطابق مشتبہ مریضوں میں اب تک دو مریضوں کے خون نمونے میں کورونا وائرس کی تصدیق ہوچکی ہے، ہسپتال ذرائع

کے مطابق کوروناوائرس سے متاثرہ ہسپتال میں پہلے سے موجود مریض کی حالت بہتر ہے اور خطرے سے باہر ہے، ان کا کہنا تھا کہ مشتبہ مریض آئیسولیشن وارڈ میں داخل ہے، ان سے کسی کو ملنے کی اجازت نہیں۔ہسپتال ذرائع کا کہنا ہے کہ کورونا وائرس کے شبے میں آنے والے تمام مشتبہ مریضوں کے خون کے نمونے ٹیسٹ کیلئے نہیں بھجوائے جارہے بلکہ محض ایک ماہ کے دوران چین، ایران یا دیگر متاثرہ ممالک سے آئے افراد کے ٹیسٹ کئے جارہے ہیں جبکہ آئیسولیشن وارڈمیں صرف ان مریضوں کو داخل کیا جاتا ہے جن کے سیمپل لئے جاتے ہیں۔