راولپنڈی(آن لائن) ملک بھر میں ڈینگی سے متاثرہ مریضوں کی تعداد میں اضافہ ہونے لگا، راولپنڈی میں ڈینگی مچھر نے دو مزید شہریوں کی جان لے لی۔تفصیلات کے مطابق راولپنڈی میں ہولی فیملی ہسپتال میں زیر علاج ڈینگی سے متاثرہ 55 سالہ خاتون نجمہ دم توڑ گئی، نجمہ کالج روڈ راولپنڈی کی رہائشی ہے، لاش ورثاء کے حوالے کردی گئی۔ہولی فیملی ہسپتال میں زیر علاج 50 سالہ پرویز بھی دم توڑ گیا، پرویز اسلام آباد کے علاقہ کورال چوک کا رہائشی ہے، لاش ورثاء کے حوالے کر دی گئی، ڈینگی بخار سے مرنے والوں کی تعداد 28 ہوگئی۔دوسری جانب شہر قائد میں ڈینگی سے

متاثرہ کیماڑی کی رہائشی 21 سالہ عذرا لیاری جنرل ہسپتال میں دم توڑ گئی، سندھ میں اب تک 12 افراد جان سے جا چکے ہیں۔حکومت پاکستان نے ملک بھر میں ڈینگی کے پھیلاؤ کی تحقیقات کرانے کا فیصلہ کر لیا ہے، ذرایع کا کہنا ہے کہ ڈینگی پھیلاؤ کی تحقیقات عالمی اداروں سے کرائی جائینگی۔ ذرایع کے مطابق حکومت ڈینگی پھیلنے کی تحقیقات کے لیے جلد عالمی اداروں سے رابطہ کرے گی، اس سلسلے میں عالمی ادارہ صحت (ڈبلیو ایچ او)، سی ڈی سی امریکا، سری لنکا سے رابطہ کیا جائیگا۔واضح رہے کہ اس سے قبل سندھ میں ایڈز کے پھیلائو کی تحقیقات بھی عالمی اداروں سے کروائی جا چکی ہے۔