لاہور(این این آئی ) سپیشل سیکرٹری محکمہ سپیشلائیزڈہیلتھ کیئر اینڈ میڈیکل ایجوکیشن کی زیرصدارت یونیورسٹی آف ہیلتھ سائنسزمیں ڈینگی ٹیسٹوں کے حوالے سے اہم اجلاس منعقد ہوا،جس میں نجی سیکٹرکے ہسپتالوں اور لیبارٹریز کے نمائندوں نے کثیر تعداد میں شرکت کی۔

اجلاس کے حاضرین کو آگاہ کیاگیا کہ پنجاب کے تمام سرکاری ہسپتالوں میں مریضوں کے ڈینگی ٹیسٹ بالکل مفت کئے جا رہے ہیں۔نجی سیکٹرکے نمائندگان نے مریضوں کو مفت سہولت دینے پر حکومت کی کاوش کو سراہا اور مکمل تعاون کی یقین دہانی کروائی اور اس بات کا اعادہ کیا کہ حکومت کے ساتھ مکمل کوارڈینیشن میں رہیں گے۔ نجی لیبز اور ہسپتال این ایس 1- ، پی سی آر، ایل ایف ٹی، الیکٹرولائٹس، آئی جی ایم اور آئی جی جی ٹیسٹوں پر 35فیصد رعایت دیں گے۔علاوہ ازیں پنجاب کے تمام نجی لیبز اور ہسپتالوںمیں ڈینگی ٹیسٹ کی قیمت 90روپے مختص کر دی گئی ہے۔نجی سیکٹر کے نمائندوں نے ہسپتالوں میں 5فیصد بستروں کوڈینگی کے مریضوں کیلئے بھی مختص کرنے کی یقین دہانی کرائی اور ہر ہسپتال میں ڈینگی ایکسپرٹ ایڈوائزری گروپ کی ایس او پی کے مطابق ڈینگی کائونٹرز بھی قائم کئے جائیں گے۔ سپیشل سیکرٹری نے نجی سیکٹر کی جانب سے مکمل تعاون کی یقین دہانی پر سراہا اور نجی سیکٹر سے مکمل کوارڈینیشن کا حکم دیا۔انہوں نے مزیدکہاکہ نجی ہسپتالوں کے ڈاکٹرز اور پیرامیڈیکل سٹاف کو مفت تربیت بھی مہیاکی جائے گی۔نجی سیکٹر کی کسی بھی لیب یا ہسپتال کے خلاف غیرقانونی اقدام پرپنجاب ہیلتھ کیئر کمیشن ایکٹ 2010کے مطابق کارروائی کی جائے گی۔