اسلام آباد (این این آئی)وزیراعظم کی معاون خصوصی برائے اطلاعات و نشریات ڈاکٹر فردوس عاشق اعوان نے کہا ہے کہ عمران خان عام آدمی کے ساتھی ہیں، اس کا معیار زندگی بلند دیکھنا ان کا نصب العین ہے،صحت انصاف کارڈ اور احساس پروگرام غریب اور نادار افراد کے تحفظ کے لیے سنگ میل ثابت ہوں گے۔
صحت کارڈ سے ملک میں ایک کروڑ پانچ لاکھ گھرانے مستفید ہوں گے، اور سرکاری اسپتالوں میں 720000 روپے تک مالیت کا علاج مفت فراہم کیا جائیگا۔ اتوار کوٹوئٹر پر اپنے بیان میں انہوں نے کہاکہ صحت انصاف کارڈ اور احساس پروگرام وزیراعظم عمران خان کی محروموں،غریبوں اور بے کسوں کا ہاتھ تھامنے اور انہیں سماجی و معاشی خوشحالی کی راہ پر گامزن کرنے کا عملی اظہار ہیں۔ انہوںنے کہاکہ عمران خان عام آدمی کے ساتھی ہیں، اس کا معیار زندگی بلند دیکھنا ان کا نصب العین ہے۔ انہوں نے کہاکہ یہ دونوں پروگرام غریب اور نادار افراد کے تحفظ کے لیے سنگ میل ثابت ہوں گے۔ انہوںنے کہاکہ بیماری سے بڑھ کر کوئی بے بسی نہیں ہوتی،صحت کارڈ سے ان غریبوں اور ناداروں کا علاج ممکن ہورہا ہے جو اپنے مالی حالات کے پیش نظر ہسپتالوں کا رخ نہیں کر پاتے۔ انہوںنے کہاکہ احساس پروگرام کا مقصد ملک بھر سے غریبوں کو غربت کی لکیر سے نکال کر معاشی ترقی کا حصہ بنانا اور عدم مساوات کا خاتمہ ہے۔ ڈاکٹر فردوس عاشق اعوان نے کہاکہ صحت کارڈ سے ملک میں ایک کروڑ پانچ لاکھ گھرانے مستفید ہوں گے، اور انہیں سرکاری اسپتالوں میں 720,000 روپے تک مالیت کا علاج مفت فراہم کیا جائے گا۔ ڈاکٹر فردوس عاشق اعوان نے کہاکہ وزیراعظم کے ویڑن کے مطابق اگلے دو برس کے دوران یہ کارڈ ڈیڑھ کروڑ افراد میں تقسیم کر دئیے جائیں گے۔
