قصور(این این آئی)محکمہ ہیلتھ قصور کے زیر اہتمام ماں اور بچے کی غذائیت سے متعلق ہفتہ آگاہی منانے کے حوالے سے ایک تقریب گزشتہ روز ڈی ایچ کیو ہسپتال میں منعقد ہوئی ۔ جس میں بطور مہمان خصوصی ایڈیشنل ڈپٹی کمشنر جنرل رانا محمد شہزاد نے شرکت کی جبکہ اس موقع پر تحریک انصاف کی رہنما مزمل مسعود بھٹی ، چیف ایگزیکٹو آفیسر ہیلتھ ڈاکٹر نذیر احمد ،ایم ایس ڈی ایچ کیو ہسپتال ڈاکٹر اظہر امین
ڈسٹرکٹ کوارڈینیٹر آئی آر ایم این سی ایچ اینڈ نیوٹریشن پروگرام ڈاکٹر ثمرہ خرم ‘ای پی آئی انچارج ڈاکٹر محمد خالد،پروگرام ڈائریکٹر چوہدری امتیاز وڑائچ ، ڈپٹی ڈی ایچ او ڈاکٹر منصور اشرف ، چائلڈ سپیشلسٹ ڈاکٹر حبیب اللہ ، ڈاکٹرکمال مصطفی اورلیڈی ہیلتھ سپروائزرز کی کثیر تعداد نے شرکت کی ۔ اس موقع پر ایڈیشنل ڈپٹی کمشنر جنرل رانا محمد شہزاد نے بچوں کی غذائیت سے آگاہی ہفتے کا افتتاح کیا اور تقریب سے خطاب کرتے ہوئے کہا کہ ماں اور بچے کی اچھی صحت کیلئے حکومت پنجاب کی طرف سے ہفتہ منانے کا مقصد ماں اور بچے کی صحت کیلئے گھر گھر آگاہی فراہم کرنا ہے تا کہ بچوں کی غذائی قلت کو دوراور ماں اور بچے کی صحت کو بہتر بنایا جا سکے ۔ چیف ایگزیکٹو ہیلتھ آفیسر ڈاکٹر نذیر احمد نے کہا کہ ضلع میں غذائیت سے متعلق ہفتہ آگاہی 8سے 13اپریل تک منایا جائیگا جس میں محکمہ ہیلتھ کی ٹیمیں گھر گھر جا کر بچوں کو وٹا منز مہیا کرینگی اور اس ویک کو منانے کا مقصد ماں اور بچوں کی غذائی قلت کو دور کرنا اور بہتر صحت کیلئے آگاہی فراہم کرنا ہے ۔ڈاکٹر ثمرہ خرم نے ماں اور بچے کی بہتر صحت کیلئے تجاویز دیں اور کہا کہ مائیں چھ ماہ تک اپنے بچوں کوصر ف اور صرف اپنا دودھ پلائیں اور اس کے بعد بچوں کو نرم غذا دینا شروع کر دیں ۔ انہوں نے مزید کہا کہ اس ویک میں چھ ماہ سے چوبیس ماہ تک کے بچوں کو وٹا منز اور معدنیات کے ساشے ‘او آر ایس ،دست اور اسہال میں مبتلا بچوں کو زنک سیرپ دیئے جائینگے اور اس کے ساتھ ساتھ اہل جوڑوں کو مانع حمل /فیملی پلاننگ کی مصنوعات مفت فراہم کی جائینگی ۔
