برازیلیا (مانیٹرنگ ڈیسک)برازیلی ڈاکٹروں نے میڈیکل کی تاریخ میں ایک کامیاب تجربہ کیاہے اوراس تجربے میں پہلی بارایک خاتون کی جھلسی ہوئی جلد کےلئے مچھلی کی جلدکواستعمال میں لایاگیاہے ۔
ویب سائٹ العربیہ کی رپورٹ کے مطابق یہ انوکھا طریقہ علاج ایک 36 سالہ خاتون ماریہ ڈی سلوا کے لئے استعمال کیا گیا، جن کی جلد پریشر ککر پھٹنے سے بری طرح جھلس گئی تھی۔ متاثرہ خاتون ماریہ نے بتایاہے کہ اسکے بازوؤں، گردن اور چہرے کے کچھ حصے کی جلد جھلس جانے سے وہ بہت تکلیف میں تھی اور ساتھ پریشان بھی تھی کہ اس کی جھلسی ہوئی جلدکاعلاج کیسے ممکن ہوگا۔
ماریہ کواس وقت حیرانی ہوئی جب ڈاکٹروں نے اس کی جھلسی ہوئی جلد پرادویات کی بجائے مچھلی کی تلی ہوئی جلد کاپلسترکرکے لپیٹ دیا۔ماریہ نے بتایاکہ مچھلی کی جلد اس کے جسم پر11دن تک لپیٹی رکھی گئی اورجب اس کواتاراگیاتواس کے زخم بھرچکے تھے جس پروہ خود بھی حیران رہ گئی ۔ ڈاکٹرزنے ماریہ ڈی سلواکی جھلسی ہوئی جلدپریہ تجربہ برازیلین سائنسدانوں ڈاکٹر اوڈریکو موریس، پروفیسر الیزبتھ موریس اور ڈاکٹر اینا پالا کی تحقیقات کی روشنی میں کیا۔واضح رہے کہ اس سے قبل یونیوورسٹی آف کیارا کےسائنسدانوں نے اپنی تحقیق میں ثابت کیا تھا کہ تلاپیا مچھلی کی جلد میں بیماری سے بچاؤ اور جراثیموں کو ہلاک کرنے کی غیر معمولی صلاحیت پائی جاتی ہے۔
