ممبئی (این این آئی)بالی وڈ اداکار سیف علی خان کو چاقو حملے میں زخمی ہونے پر اسپتال پہنچانے والے رکشہ ڈرائیور کو نقد انعام دیا گیا ہے۔سیف علی خان کو زخمی ہونے کے بعد گھر کی گاڑی کے بجائے رکشہ میں مقامی اسپتال پہنچایا گیا۔بھارتی میڈیا کی رپورٹ کے مطابق سیف علی خان کو اسپتال پہنچانے والے رکشہ ڈرائیور بھجن سنگھ رانا کو ایک سوشل ورکر کی جانب سے 11 ہزار بھارتی روپے انعام میں دیے گئے ہیں۔
رپورٹ میں بتایا گیا کہ ممبئی کے سوشل ورکر فہیم انصاری نے بھجن سنگھ رانا کو 11 ہزار روپے کا نقد انعام دیا۔ بھارتی میڈیا کے مطابق انعام حاصل کرنے کے بعد رکشہ ڈرائیور نے بتایا کہ مجھے بہت فخر محسوس ہو رہا ہے کیونکہ میں نے کبھی نہیں سوچا تھا کہ میری زندگی میں کچھ ایسا ہوگا، میں سیف کی مدد کرنے پر خوش ہوں۔
