لاہور(این این آئی)پاکستان کی سینئر اداکارہ بشریٰ انصاری نے سردیوں میں خشک جلد کو موئسچرائز رکھنے کیلئے ہیروئنز کا آزمایا ہوا آسان اور سستا ٹوٹکا بتادیا۔حال ہی میں بشریٰ انصاری اداکارہ روبینہ اشرف کے ہمراہ نجی ٹی وی چینل کے مارننگ شو میں شریک ہوئیں جس میں روبینہ اشرف نے بتایا کہ ان کی جلد بے حد خشک ہے جس کیلئے انہوں نے دنیا کے مہنگے سے مہنگے ترین پراڈکٹس استعمال کیے لیکن کوئی خاص فائدہ نہ ہوسکا جس کے بعد بشریٰ انصاری کے آسان ٹوٹکے نے ان کی مدد کی اور اب انہیں یقین ہے کہ اس ٹوٹکے سے بہتر کوئی اور چیز نہیں۔

اس موقع پر بشریٰ انصاری نے سردیوں میں خشک جلد کو موئسچرائز رکھنے کا آسان اور سستا طریقہ بتاتے ہوئے کہا کہ ‘ ماضی کی ہیروئن چاہے گوری ہو یا سانولی ان کی جلد چمکدار ہوتی تھی ، اسی چمکدار جلد کا راز جب میں نے اداکارہ بابرہ شریف کی بہن سے پوچھا تو انھوں نے بتایا کہ ہم جلد پر گلیسرین ،گلاب کا عرق اور لیموں ملا کر لگاتے ہیں لیکن اس وقت میں نے اس ٹوٹکے پر عمل نہیں کیا’۔تاہم اب میں’ 2 ٹیبل اسپون بائیو آئل میں ایک ٹیبل اسپون ای آئل ، گلیسرین اور اصلی کھوپرے کا تیل اور کیسٹرآئل ملاکر چہرے پر روزانہ لگاتی ہوں’۔بشریٰ انصار کا کہنا تھا یہ تمام چیزیں حیران کن فائدہ دیتی ہیں کیوں کہ یہ تمام چیزیں اصلی ہیں، ان میں کوئی کیمیکل موجود نہیں ہوتا، مجھے اس ٹوٹکے کے ساتھ ہیلورونک ایسڈ کی بھی ضرورت نہیں ہوتی۔