لاہور(این این آئی)سینئر اداکار بابر علی کا کہنا ہے کہ گڈانی شپ یارڈ میں میرا ایکسیڈنٹ ہونا میری زندگی کا سب سے غمگین لمحہ ہے۔اداکار بابر علی حال ہی میں ایک نجی ٹی وی شو میں شریک ہوئے جس دوران میزبان و شاعر وصی شاہ نے ان سے سوال کیا کہ آپ کی زندگی کا سب سے غمگین یا تکلیف دہ لمحہ کون سا ہے ؟سوال کے جواب میں بابر علی نے بتایا کہ’ ایک فلم کی شوٹنگ کے دوران میرا گڈانی شپ یارڈ میں ایکسیڈنٹ ہوا اور میں 110 فٹ سے نیچے گرگیا، اس حادثے میں میرے پاؤں کی ہڈیاں بری طرح ٹوٹ گئی تھیں،ایکسیڈنٹ کے بعد 3 ماہ تک بیڈ ریسٹ پر رہا۔

بابر علی نے بتایا کہ اس حادثے کے بعد مجھے لنگڑے گھوڑے کا خطاب ملا، مجھ سے متعلق کہا جاتا تھا کہ مجھے اب فلموں میں کیا لینا اب میں ہیرو نہیں رہا؟ لوگوں نے مجھ سے معاوضے واپس مانگ لیے،کہا جارہا تھا کہ میرا کیرئیر ختم ہوچکا ہے اس وقت سب میرا ساتھ چھوڑ گئے لیکن صرف 3 لوگ میرے ساتھ تھے جن میں میرے والدین، ہونے والی شریک حیات اور سسرالی شامل ہیں۔

اداکار نے اس واقعے پر لوگوں میں آئی تبدیلی سے متعلق بات کرتے ہوئے بتایا کہ مجھے خودکو لنگڑا گھوڑا کہنے والے چہرے بھی برے نہیں لگتے لیکن مجھے سراہنے والے چہروں کا بدلنا نہیں بھولاجاتا، اس شدید مشکل کے بعد مجھے سید نور کی فلم’ مہندی والے ہاتھ’ اور خلیل الرحمان کی فلم ‘گھر کب آؤگے’ میں ولن کا موقع دیا گیا اور پھر سے ایک بار مجھے کیرئیر میں عروج نصیب ہوا، اس کے بعد میرا معاوضہ ہیرو سے بھی کہیں زیادہ ہوگیا۔