اسلام آباد (مانیٹرنگ ڈیسک) گلوکارہ و ماڈل میشا شفیع کی جانب سے گلوکار علی ظفر پر جنسی ہراساں کرنے کے الزامات کے بعد ہر کوئی اپنی اپنی رائے اور خیالات کا اظہار کر رہا ہے، کوئی میشا شفیع کو تنقید کا نشانہ بنا رہا ہے تو کسی نے علی ظفر کو تختہ مشق بنایا ہوا ہے۔ ایسے میں اداکارہ ریشم نے ایک نجی ٹی وی چینل کے پروگرام میں گفتگو کرتے ہوئے کہا کہ
جب ہم ایسے کسی اداکار اور آرٹسٹ سے متعلق کوئی ایسی بات سنتے ہیں جس نے ملک سے باہر جا کر ملک کی عزت کو بڑھایا، تو ہمیں دھچکا لگتا ہے۔ اداکارہ ریشم نے کہا کہ میں نے جب بھی گلوکار علی ظفر سے بات کی تو مجھے ان کی کوئی بات بھی اخلاقیات سے گری ہوئی نہیں لگی۔ اداکارہ ریشم نے نجی ٹی وی چینل سے گفتگو کرتے ہوئے کہا کہ مجھے نہیں لگتا کہ علی ظفر ایسا کچھ کر سکتے ہیں۔ انہوں نے کہا کہ علی ظفر کی شادی ہمارے سامنے ہوئی، ہم لوگ ان کی شادی میں گئے، مختلف تقریبات میں ہماری ملاقات ہوتی رہتی ہے، اس کے علاوہ جب ایوارڈ شوز ہوتے ہیں تو ہم لوگ بیک سٹیج پر ہنسی مذاق کرتے ہیں، انہوں نے کہا کہ علی ظفر نے کبھی کوئی ایسا کام نہیں کیا۔ ریشم نے کہا کہ علی ظفر کے پورے کیرئیر میں کبھی کوئی سکینڈل سامنے نہیں آیا اور نہ ہی علی ظفر نے کبھی کوئی ایسی حرکت کی جو پاکستان کے لیے بدنامی کا باعث بنی ہو، اداکارہ ریشم نے کہا کہ میں انیس بیس سال سے علی ظفر کو جانتی ہوں اور میرے ذاتی تجربے کے مطابق وہ اچھے دوست اور بے حد اچھے انسان ہیں، انہوں نے کہا کہ ہو سکتا ہے کہ میشا شفیع کے ساتھ کوئی غلط فہمی ہو گئی ہو جو ان کو خود بیٹھ کر حل کرنی چاہیے، ریشم نے بات چیت کرتے ہوئے کہا کہ مجھے اس معاملے میں کوئی سچائی نظر نہیں آتی،
اس معاملے کی سچائی کچھ اور ہے۔ میشا شفیع ایک بڑی فنکارہ کی بیٹی ہیں اور خود بھی وہ قابل ہیں، ریشم نے کہا کہ یقیناً بات کچھ اور ہی ہے۔ انہوں نے کہا کہ آج کا مرد جتنا طاقتور ہے اتنی ہی عورت بھی طاقتور ہے، اداکارہ نے کہا کہ کسی عورت کو اگر کوئی مرد ہراساں کرنے کی کوشش کرے تو عورت کو اللہ نے ہاتھ عطا کیے ہیں وہ تھپڑ مارے یا جوتی مارے۔ ایسی حرکت کرنے والے مرد کو اس کی حد بتا دینا چاہیے۔
