ممبئی(این این آئی) بالی ووڈ کی نامور اداکارہ شلپا شیٹھی کے بیٹے کی ٹائیگر شروف کے گیت پر رقص کی ویڈیو نے سوشل میڈیا پر دھوم مچادی۔بھارت میں گزشتہ دنوں ریلیز ہونے والی ایکشن سے بھرپور فلم ’باغی ٹو‘ نے چند دنوں میں کروڑوں روپے کما کر مقبولیت کے جھنڈے گاڑھ دیئے ہیں جس کی بنیادی وجہ ٹائیگر شروف ہیں جنہوں نے اپنے ایکشن اور ڈانس سے بڑوں کے ساتھ ساتھ بچوں کو بھی اپنا گرویدہ بنایا ہوا ہے۔
یہی وجہ ہے کہ شلپا شیٹھی کے بیٹے نے بھی ٹائیگر کے گیت پر رقص کرکے سب کو حیران کردیا۔بالی ووڈ کی نامور اداکارہ شلپا شیٹھی نے سماجی رابطے کی ویب سائٹ انسٹا گرام پر اپنے بیٹے ’ویان‘ کی ویڈیو شیئر کی جس میں دیکھا جا سکتا ہے کہ وہ ٹائیگر شروف کے گیت ’منڈیا تو ‘ پر رقص کرنے کی معصومانہ کوشش کرنے میں مصروف ہے جب کہ شلپا شیٹھی نے فلم کے ہدایتکار احمد خان کو مخاطب کرتے ہوئے کہا کہ پہلے میں نے آپ کی دھن پر ڈانس کیا اور اب میرا بیٹا کر رہا ہے۔ٹائیگر شروف بھی ویان کی تعریف کئے بغیر نہ رہے انہوں نے سماجی رابطے کی ویب سائٹ ٹوئٹر پر ویان کی متاثر کن پرفارمنس کی پیار بھرے انداز میں تعریف کی۔شلپا شیٹھی کے بیٹے ’ویان‘ کی ٹائیگر سے محبت کا اندازہ راج کندرہ کی جانب سے شیئر کی گئی ویڈیو سے لگایا جا سکتا ہے جس میں وہ اپنے دوست کی سالگرہ پر ٹائیگر شروف ہی کی فلم ’منا مائیکل‘ کے گیت ’ڈنگ ڈانگ‘ پر رقص کر رہے ہیں۔
