ممبئی (این این آئی) سوشل میڈیا پر بالی ووڈ فلموں پر تبصرے اور سپر اسٹارز پر نامناسب الفاظ میں تنقید کرنے والے بھارتی تجزیہ کار و اداکار کمال راشد خان جو کے آر کے کے نام سے بھی جانے جاتے ہیں، پیٹ کے کینسر میں مبتلا ہو گئے ہیں-عرفان خان کے بعد ایک اور بالی ووڈ اداکار تشویشناک بیماری میں مبتلا ہو گئے۔ بالی ووڈ فلموں پر بے لاگ تبصروں اور متنازع بیانات دینے والے کمال راشد خان پیٹ کے کینسر میں مبتلا ہو گئے ہیں ۔

جس کی تصدیق انہوں نے خود سماجی رابطے کی ویب سائٹ ٹوئٹر پر اپنی جاری کردہ پریس ریلیز میں کی۔کمال راشد خان نے اپنے ٹوئٹ میں کینسر کی تصدیق کرتے ہوئے کہا کہ میں تیسرے درجے کے پیٹ کے کینسر میں مبتلا ہوں اور میرے پاس زندہ رہنے کے لئے صرف ایک سے ڈیڑھ سال کا وقت درکار ہے۔ کمال راشد نے کہا کہ مجھے صرف دو باتوں کا ہی افسوس رہے گا ایک تو یہ کہ میں بطور پروڈیوسر ایک اچھی سی فلم بنانا چاہتا تھا اور دوسرا یہ کہ میں امیتابھ بچن کے ساتھ فلم میں کام کرنا اور اْن کے ساتھ ایک فلم بنانا چاہتا تھا-انہوں نے کہا کہ مجھے اب کسی کی ہمدردی کی بھی ضرورت نہیں جب کہ میں اب بھی اْن لوگوں کی حوصلہ افزائی کروں گا جو مجھے گالیاں ،نفرت اور پیار کرتے ہیں۔ انہوں نے دکھی انداز میں کہا کہ میں زندگی کے آخری ایام اپنی فیملی کے ساتھ گزار چاہتا ہوں۔ واضح رہے کہ کمال راشد اپنے متنازع بیانات کی وجہ سے خبروں کی زینت بنے رہتے ہیں اور گزشتہ کئی روز سے اپنا اکائونٹ بند ہونے کے بعد ایک بار پھر متحرک ہو گئے ہیں۔

موضوعات:کمال راشد خان