اسلام آباد (نیوز ڈ یسک) 2026 کی تازہ پاسپورٹ رپورٹ میں پاکستانی شہریوں کے لیے بین الاقوامی سفر سے متعلق نئی تفصیلات جاری کردی گئی ہیں۔
رپورٹ کے مطابق پاکستانی پاسپورٹ رکھنے والے افراد دنیا کے 9 ممالک میں پیشگی ویزا حاصل کیے بغیر داخل ہوسکتے ہیں، جبکہ عالمی پاسپورٹ رینکنگ میں پاکستان 183ویں پوزیشن پر موجود ہے۔رپورٹ میں پاکستانی پاسپورٹ کا موبلٹی اسکور 42 بتایا گیا ہے۔ اس کا مطلب ہے کہ پاکستانی شہری مجموعی طور پر 42 مقامات پر مختلف سفری سہولتوں کے تحت سفر کرسکتے ہیں۔ ان میں 9 مقامات پر ویزا فری انٹری، 29 ممالک میں ویزا آن ارائیول جبکہ 4 مقامات پر الیکٹرانک ٹریول اتھارائزیشن (eTA) کی سہولت دستیاب ہے۔فہرست کے مطابق بارباڈوس، ڈومینیکا، دی گیمبیا، ہیٹی، مائیکرونیشیا، روانڈا، سینٹ ونسنٹ اینڈ دی گریناڈائنز، ٹرینیڈاڈ اینڈ ٹوباگو اور وانواتو پاکستانی شہریوں کو ویزا فری داخلے کی سہولت فراہم کرتے ہیں۔تاہم مختلف ممالک میں قیام کی مدت، پاسپورٹ کی میعاد، واپسی کے ٹکٹ اور دیگر امیگریشن شرائط الگ ہوسکتی ہیں۔
اس لیے سفر شروع کرنے سے قبل متعلقہ ملک کے سرکاری امیگریشن ذرائع سے تازہ قواعد کی تصدیق کرنا ضروری ہے۔اعداد و شمار کے مطابق دنیا کے 156 مقامات ایسے ہیں جہاں پاکستانی شہریوں کو سفر سے پہلے ویزا حاصل کرنا لازمی ہے۔ دوسری جانب پاکستانی پاسپورٹ کا موبلٹی اسکور بھی گزشتہ سال کے 44 سے کم ہوکر رواں سال 42 ہوگیا ہے۔رپورٹ میں پاکستانی پاسپورٹ کی گزشتہ چند برسوں کی عالمی درجہ بندی بھی بیان کی گئی ہے۔ 2023 میں پاکستان 180ویں، 2024 میں 175ویں اور 2025 میں 174ویں نمبر پر تھا، جبکہ 2026 میں اس کی پوزیشن 183ویں ہوگئی ہے۔واضح رہے کہ پاسپورٹ انڈیکس کی درجہ بندی مختلف ادارے اپنے الگ طریقہ کار اور معیار کے تحت مرتب کرتے ہیں، اسی وجہ سے ویزا فری ممالک کی تعداد اور عالمی رینکنگ مختلف رپورٹس میں یکساں نہیں ہوتی۔ پاکستانی مسافروں کو چاہیے کہ کسی بھی بین الاقوامی سفر سے قبل متعلقہ سفارتخانے یا سرکاری امیگریشن ویب سائٹ سے داخلے کے موجودہ قوانین کی تصدیق کرلیں۔
