اسلام آباد (نیوز ڈیسک) ملک میں گندم کا سنگین بحران سر اٹھانے لگا ہے اور خدشہ ظاہر کیا جا رہا ہے کہ اس سال گندم کی کاشت میں پچاس فیصد کمی ہوسکتی ہے۔ حکومت نے اعتراف کیا ہے کہ امدادی قیمت مقرر نہ کرنے سے پیداوار متاثر ہوئی، جبکہ آئندہ برس گندم درآمد کے لیے تقریباً ڈیڑھ ارب ڈالر خرچ کرنے کی تیاری کی جا رہی ہے۔قومی اسمبلی کی قائمہ کمیٹی میں گفتگو کرتے ہوئے وفاقی وزیر فوڈ سیکیورٹی رانا تنویر حسین نے کہا کہ کوشش ہے اکتوبر کے اوائل میں گندم پالیسی سامنے لائی جائے۔ ان کا کہنا تھا کہ گندم کی سپورٹ پرائس بحال کرنے کی تجویز دی گئی ہے اور اس سلسلے میں عالمی مالیاتی ادارے (آئی ایم ایف) سے بات چیت بھی جاری ہے تاکہ انہیں فوڈ آئٹمز پر قائل کیا جا سکے۔

وفاقی وزیر کے مطابق حکومتی کنٹرول کم ہونے کے باعث مارکیٹ میں قیمتوں میں اضافہ ہوا ہے جبکہ کسانوں کی مایوسی سے پیداوار پر براہِ راست اثر پڑا ہے۔ انہوں نے کہا کہ کسانوں اور عام صارفین دونوں کے مفاد کو مدنظر رکھ کر اقدامات کیے جا رہے ہیں۔چینی کی صورتحال پر بات کرتے ہوئے رانا تنویر نے بتایا کہ 15 کروڑ ڈالر مالیت کی چینی درآمد کی جا رہی ہے۔ ان کے مطابق اگرچہ رواں برس گنے کی بمپر کراپ ہوئی تھی، لیکن ممکنہ سیلاب کے اثرات اور مافیا کی سرگرمیوں نے چینی کی قیمتوں کو اوپر دھکیل دیا ہے۔