کراچی (این این آئی)سلطنت عمان کے قونصل جنرل سمیع عبداللہ سلیم الخانجاری نے کراچی کے تاجروں کو عمان میں سرمایہ کاری کی دعوت دیتے ہوئے کہا ہے کہ عمان میں سرمایہ کاری کے وسیع مواقع موجود ہیں جس سے کراچی کے تاجر بہت زیادہ فوائد حاصل کرسکتے ہیں۔ عمان میں پیٹروکیمیکلز سمیت دیگر شعبوں میں تجارتی کی نئی راہیں تلاش کی جاسکتی ہیں جہاں مشترکہ شراکت داری اور کاروباری معاہدوں کے ذریعے دونوں ملکوں کی تاجر برادری نہ صرف ایک دوسرے کے قریب آسکتی ہے بلکہ دونوں ملکوں کی معیشتوں پر مثبت اثرات مرتب ہوں گے اور اقتصادی تعلقات بھی مزید مستحکم ہوں گے۔
ان خیالات کا اظہار انہوں نے پاکستان کیمیکلز اینڈ ڈائز مرچنٹس ایسوسی ایشن( پی سی ڈی یم اے) کے چیئرمین سلیم ولی محمد کی سربراہی میں عمان کے قونصلیٹ میں مدعو کے لیے وفد سے ملاقات کے موقع پر کیا۔ وفد میں چیف کوآرڈینٹر عارف بالاگام والا، عمران چٹی اور احمد جہانگیر شامل تھے۔قونصل جنرل نے پی سی ڈی ایم اے کے وفد کو عمان کے دورے کی دعوت دیتے ہوئے کہا کہ وہ عمان میں پیٹروکیمیکلز سیکٹر سمیت دیگر شعبوں کا جائزہ لیں اور عمان کے تاجروں کے ساتھ بزنس ٹو بزنس میٹنگز شیڈول کریں جس کا اہتمام قونصلیٹ کرے گا جبکہ پی سی ڈی ایم اے کی سفارش پر ویزے میں بھی سہولتیں فراہم کی جائیں گی۔
انہوں نے دونوں ملکوں کے مابین باہمی تجارت کے فروغ اور اقتصادی تعلقات کو مزید مستحکم کرنے پر بھی زور دیا اور مشترکہ طور پر باہمی تعاون پر بھی اتفاق کیا۔چیئرمین پی سی ڈی ایم اے سلیم ولی محمد نے قونصل جنرل کو کیمیکلز اینڈ ڈائز سیکٹر کے بارے میں تفصیلی بریفنگ دی اور صنعتی خام مال کی درآمد کے حوالے سے عمان میں دستیاب ڈائز اینڈ کیمیکلز سیکٹر سے متعلق آگاہی حاصل کی۔ انہوں نے قونصل جنرل سے عمان کے تاجروں کے ساتھ بی ٹو بی میٹنگز، رابطوں اور تجارتی مواقعوں کی دستیابی پر بھی تبالہ خیال کیا۔ انہوں نے قونصل جنرل کی جانب سے وفد کے دورے کی دعوت کا خیرمقدم کرتے ہوئے کہا کہ دونوں ملکوں کی طرف سے وفود کے تبادلے سے باہمی تجارت کو فروغ حاصل ہوگا اور کاروباری رابطے بھی وسیع ہوں گے جس سے پاکستان اور عمان ایک دوسرے کی تجارتی ضروریات کو پورا کرنے میں مدد ملے گی۔
