کوئٹہ( این این آئی) وزیراعلیٰ بلوچستان کی ہدایت پر صوبے بھر میں سرکاری ملازمتوں پر گھوسٹ ملازمین کی نشاندہی کرنے کے لئے محکمہ خزانہ بلوچستان کی جانب سے تمام محکموں کو ضروری ہدایات جاری کی گئی تھیں جس کے تحت متعلقہ افسر انچارج (DDO) نے ملازمین کی تصدیق شدہ فہرستیں اکاؤنٹینٹ جنرل آفس اور ضلعی خزانہ آفسز میں جمع کرانی تھی، بصورت دیگر تمام غیر مصدقہ ملازمین کی تنخواہیں اکتوبر کے مہینے سے بند ہونا قرار پائیں۔
اس فیصلے کی روشنی میں ماہ اکتوبر کی تنخواہ صرف مصدقہ فہرست کے تحت جاری کی جائیگی۔ لہٰذا وہ تمام محکمے اور افسر انچارج، جنہوں نے تاحال تصدیق شدہ فہرستیں جمع نہیں کرائیں، ان کو تاکید کی جاتی ہے کہ وہ بہرحال ملازمین کی تصدیق شدہ فہرستیں مؤرخہ 28 اکتوبر 2024 تک اکاؤنٹینٹ جنرل آفس اور ضلعی خزانہ آفسز میں جمع کروا دیں۔ بصورت دیگرتمام غیر تصدیق شدہ ملازمین کی تنخواہیں، گھوسٹ تصور کرتے ہوئے، ماہ اکتوبر 2024 سے بند کردی جائینگی۔
